सहकारी जागरणका लागि 'गीति संग्रह'

काठमाडौं । सहकारी गीति संग्रह ‘एकका लागि सबै, सबैका लागि एक’ बजारमा आएको छ । शिखर बचत तथा ऋण सहकारी संस्था लिमिटेड, झापाले बजारमा ल्याएको गीति संग्रहको काठमाडौंमा एक कार्यक्रमको आयोजना गरि बिमोचन गरिएको हो ।

उक्त गीति संग्रहलाई सहकारी विभागका उप–रजिष्ट्रार नारायण ज्ञवाली र गायक प्रमोद खरेलबाट संयुक्त रुपमा विमोचन गरिएको हो । संग्रहमा सहकारी सम्बन्धी ६ वटा गीत समावेश गरिएको छ ।

बिमोचन कार्यक्रममा बोल्दै सहकारी विभागका उप–रजिष्ट्रार नारायण ज्ञवालीले समुदायमा सहकारी जागरण, सचेतना र सहकारी चिनाउने सन्दर्भमा गीत संगितले महत्वपूर्ण भूमिका खेल्ने बताए । दुर–दराजमा सहकारीका बारेमा जानकारी गराउन यस गीति संग्रह सफल हुने बताए । त्यस्तै गायक प्रमोद खरेलले गीतले सहकारी क्षेत्रमा विशेष भूमिका खेल्ने बताउँदै सहकारी क्षेत्रलाई समृद्धशाली बनाउने मद्दत पुग्नेछ । गीत संगीतको माध्यमबाट हरेक कुराहरु परिवर्तन हुने र सहकारी क्षेत्रमा पनि सहयोग हुने बताए । यसैगरी शिखर बचत तथा ऋण सहकारी संस्थाका अध्यक्ष दिपेन्द्र राउतले सहकारी क्षेत्रमा जागरण फैलाउन यस्ता गीत संगित आवश्यक हुने बताए । सहकारीको बारेमा आम समुदायलाई जानकारी गराउने एउटा महत्वपूर्ण माध्यम गीत संगीत भएको धारणा राखे ।

संग्रहमा ‘एकका लागि सबै’, ‘थोपा थोपा मिलेर’, ‘पक्कै नेपाल बन्दै छ’, ‘गाउँ गाउँमा सहकारी’, ‘मेची कालि सबैतिर’ र ‘अनेकतामा एकता’ बोलको गीत रहेको छ । प्रमोद खरेल, हेमन्त शर्मा, चेतन चुडाल र तिलक मल्लको स्वर रहेको गीतको शब्द दीपेन्द्र राउत, हिमालय प्रसाई र योगेन्द्र पौडेलको रहेको छ । यस गीति संग्रहको आधिकारीक विक्रेता को–अपरेटिभ मिडिया सोलुसन रहेको छ ।