हातेमालो र जोर्लाईमाई सहकारी बीच सैद्धान्तिक एकीकरण घोषणा

बारा । सिमरास्थित हातेमालो बचत तथा ऋण सहकारी संस्था र डुमरवानास्थित जोर्लाइमाई बचत तथा ऋण सहकारी संस्थावीच एकीकरण हुने भएको छ ।

हातेमालो सहकारीमा आयोजित दुवै संस्थाका पदाधिकारीहरुले संस्थाहरुबीच एकीकरणको सैद्धान्तिक घोषणा गरेका हुन् । हातेमालोका अध्यक्ष कृष्ण पौडेलको अध्यक्षतामा बसेको संयुक्त वैठकले आगामी असोज १५ गतेसम्म एकीकरण गरिसक्ने घोषणा भएको हो ।

सहकारी अभियानको आवश्यकता, गुणस्तरीय वित्तिय सेवा र जोखिम न्युनीकरणका लागि संस्था एकीकरणमा पवित्र भावनाका साथ अग्रसर भएको हातेमालोका अध्यक्ष कृष्ण पौडेलले बताए । त्यस्तै जोलाईमाई साकोसका अध्यक्ष तिलक रिमालले सदस्यहरुको हित र वित्तिय सेवा प्रभावकारी बनाउनका लागि आफुहरु एकीकरण प्रक्रियामा अघि बढेको बताए ।

दुबै संस्थाहरुबीच एकीकरणलाई प्राविधिक ढंगले पुरा गर्नका लागि हातेमालो सहकारीका सञ्चालक दिपक भट्टको संयोजकत्वमा पांच सदस्यीय कार्यदलसमेत गठन गरेको छ । कार्यदलमा हातेमालोको तर्फबाट बरुण गौतम र महेश ढुंगेल एवम् जोर्लाइमाई साकोसको तर्फबाट केशवमाया अर्याल र चोलानाथ आचार्य रहेका छन् ।

एकीकरणपछि संस्थाको नाम हातेमालो बचत तथा ऋण सहकारी संस्था नै रहने र हाल जोलाईमाई सहकारी रहेको स्थानमा सेवा केन्द्र स्थापना गर्ने घोषणा गरिएको छ ।

२३०० सदस्यहरुवीच २१ करोडको कारोवार रहेको हातेमालो सहकारी र करीव २०० सदस्यहरुवीच करीव पचास लाखको कारोवार रहेको जोर्लाईमाई सहकारीवीच एकीकरणपछि सदस्य संख्या २५०० र कारोवार २२ करोड पुग्ने र समुदायमा सहकारीप्रति विश्वास र कारोवार थप वृद्धि हुने अध्यक्ष कृष्ण पौडेलले बताए ।