निलगिरि सहकारी अस्पताल द्वारा निशुल्क स्वास्थ्य परिक्षण

बागलुङ । धौलागिरि सञ्जिवनी स्वास्थ्य सहकारी संस्था लिमिटेड बागलुङद्वारा सञ्चालित निलगिरि अस्पताल बागलुङको प्राविधिक सहयोगमा सनराईज आवासीय उच्च माध्यामिक विद्यालयमा अध्ययनरत विद्यार्थीहरुको आइतवार स्वास्थ्य परिक्षण गरिएको छ ।

विद्यालयको १७ औँ बार्षिकोत्सवको अवसरमा अस्पतालले निशुल्क स्वास्थ्य परिक्षण गराएको हो । निलगिरि अस्पतालका मेडिकल अधिकृत डा. सुनिल सिलवालको नेतृत्वमा करिब २ सय ५० जना विद्यार्थीहरुको नाक, कान, घाटीको परिक्षण गरिएको थियो । कक्षा १० सम्ममा विद्यार्थीहरुको परिक्षण गर्दा स्वास्थ्यमा धेरै खराबी भएका विद्यार्थीहरुलाई निशुल्क औषधी वितरण गरिने समेत अस्पतालले जानकारी गराएको छ । शिविरमा अस्पतालका अहेव रविन शर्मा, स्टाफ नर्स सिता शेरपुञ्जाली, अनमी यूमाया पुन लगायतका स्वास्थ्यकर्मीले स्वास्थ्य परिक्षण गरी औषधी वितरण गरेका थिए ।

विशेषज्ञ सेवा तथा दुर्गम क्षेत्रमा समेत सेवा सुविधा दिदैँ आएको अस्पतालले अहिले विद्यार्थीहरुको स्वास्थ्यलाई मध्यनजर गर्दै स्वास्थ्य परिक्षण गरिएको सञ्जिवनी स्वास्थ्य सहकारीका सचिव रामबहादुर जिसीले बताए । विद्यालयको वार्षिकोत्सवका अवसरमा १ देखि १० कक्षा सम्मका विद्यार्थीहरुलाई चार समुह बनाई चित्रकला प्रतियोगिता सम्पन्न गरिएको छ । प्रतियोगिता पुर्व प्रावि तहका विद्यार्थीहरु बिच, १ देखि ३ सम्म, ४ देखि ६ सम्म र ७ देखि १० कक्षा सम्मका विद्यार्थीहरु बिच प्रतियोगिता सम्पन्न गरिएको विद्यालयका प्रिन्सिपल चन्द्र क्षेत्रीले बताए ।