सहकारीको गुणात्मक विकास गर्न जरुरीः घिमिरे

सिमरा, ५ माघ । नेपाल बचत तथा ऋण केन्द्रीय सहकारी संघ लिमिटेड (नेफस्कून) का अध्यक्ष ऋषिराज घिमिरेले मुलुकको सहकारी अभियानको सुद्धीकरण र गुणात्मक विकास गर्न जरुरी रहेको  बताएका छन् ।

जिल्ला बचत तथा ऋण सहकारी संघ सर्लाहीको भक्तिपुरमा चौथो वार्षिक साधारणसभालाई बोल्दै मुलुकमा नागरिक र समाजको पक्षमा काम गर्ने सबैभन्दा ठुलो र जिम्मेवार संगठनको रुपमा सहकारी अभियान रहेको र उनीहरुकै प्रयासबाट ग्रामिण अर्थतन्त्र चलायमान र गतिशिल भएको बताए ।

 घिमिरेले शहरका केही सहकारीहरुमा समस्या आएको तर मुलुकभरका क्रियाशिल करीव २७ हजार सहकारीहरुमध्ये ९९ प्रतिशत सहकारीहरु सफल सञ्चालनमा रहेको र उनीहरुले राष्ट्रिय अर्थतन्त्रलाई सुदृढ बनाउन सहयोग पुर्याई रहेको दाबी गरे । समुदायमा आधारित सदस्यकेन्द्रीत भई व्यवसायिक रुपमा सञ्चालन गर्दा समस्या नआउने बताए ।