प्राकृतिक विपतमा सहयोगका लागि जुट्न सहकारीहरुलाई महासंघको आव्हान

काठमाडौं : राष्ट्रिय सहकारी महासंघले मुलुकभरका सहकारी संघ संस्थालाई प्राकृतिक विपत्को समयमा उद्धार र राहतकार्यमा जुट्न आव्हान गरेको छ ।

महासंघले आज एक विज्ञप्ति जारी गर्दै अविरल वर्षाका कारण उत्पन्न बाढी, पहिरो, कटान र डुबानले मुलुकका विभिन्न भागमा व्यापक जनधनको क्षति पुर्याएकाले आआफ्नो क्षेत्रबाट सबैले सहयोग गर्न अपील गरेको छ ।

नेपाल सरकारले प्रभावित क्षेत्रका नागरिकहरूको खोजी, उद्धार, राहत तथा पुनःस्थापनाका लागि गरिरहेका प्रयास र पूर्वतयारीको सर्हना गर्दै, महासंघ यस कार्यमा सबै सरोकारवाला निकायहरूसँग निरन्तर समन्वय र सहकार्यका लागि प्रतिबद्ध रहेको जनाएको छ ।

यस कठिन घडीमा, महासंघ सम्पूर्ण सहकारीकर्मी, विषयगत केन्द्रीय, प्रदेश तथा जिल्लास्तरीय सहकारी संघहरू, राष्ट्रिय सहकारी बैंक र देशभरका प्रारम्भिक सहकारी संस्थाहरूलाई आफ्नो आ-आफ्नो स्थानबाट उद्धार, राहत र पुनःस्थापनाका कार्यमा सक्रिय रूपमा जुट्न अपील गरेको छ ।

महासंघका कार्यवाहक अध्यक्ष तथा बरिष्ठ उपाध्यक्ष रमेश पोखरेलले एक विज्ञप्ति जारी गर्दै स्थानीय सरकार, सुरक्षाकर्मी, समुदाय तथा संघ/संस्थासँग सघन समन्वय गरी प्रभावित क्षेत्रका नागरिकहरू तथा सदस्यहरुलाई तत्काल सहयोग पुर्याउन सहकारी अभियानको मानवीय र सामाजिक उत्तरदायित्व रहेको बताएका छन् ।

सबै सहकारी संघ/संस्थाहरूलाई यस विपतका कारण प्रभावित भएका नागरिकहरूको सहयोगार्थ सहकारी अभियानमार्फत लागिपर्न अनुरोध गरिएको छ । साथै, यो विपतको कारण स्वयं सहकारी संघ/संस्थाहरू पनि प्रभावित हुने सम्भावना रहेको हुँदा, सम्बन्धित विषयगत केन्द्रीय सहकारी संघहरूलाई प्रभावित सदस्य सहकारी संघ/संस्थाहरूको तथ्याङ्क संकलन गरी महासंघसँग निरन्तर समन्वय र सहकार्य गर्न अनुरोध गरेको छ ।

विज्ञप्तिमा भनिएको छ, ‘संकटको यस घडीमा, हामी सबैको एकता, सहकार्य र मानवीय भावना नै राहत र पुनःस्थापनाको वास्तविक आधार हो । सहकारी आन्दोलन सदैव समुदायको साथमा रहँदै आएको छ र आगामी दिनहरूमा पनि रहिरहने प्रतिबद्धता व्यक्त गर्दछौं । यस विपतबाट ज्यान गुमाउनुभएका प्रति हार्दिक श्रद्धाञ्जली अर्पण गर्दै, वेपत्ता भएकाहरूको सकुसल उद्धार तथा घाइतेहरूको शीघ्र स्वास्थ्यलाभको कामना गर्दछौं ।’