समस्याग्रस्त सहकारीबाट ३ अर्ब ७१ करोड बचत फिर्ता, थप दुई संस्थाको राफसाफ हुँदै

काठमाडौं : समस्याग्रस्त सहकारी व्यवस्थापन समितिले चालु आर्थिक वर्ष २०८१/८२ को असार १५ गतेसम्म बचतकर्ताहरुलाई ३ अर्ब ७१ करोड ६६ लाख ५ हजार ६५४ रुपैयाँ फिर्ता तथा मिलान गरेको छ । समितिले चालु आर्थिक वर्षको असार १५ गतेसम्म मात्रै २ अर्ब ८८ कराेड ८४ हजार ७८० रुपैयाँ फिर्ता तथा मिलान गरेको छ । समितिले आज (आइतबार) पत्रकार सम्मेलन आयोजना गर्दै २२ सहकारीका ६१ हजार ९४ जनालाई बचत फिर्ता तथा हिसाब मिलान गरिएको जानकारी दिएको छ ।

समितिका अनुसार ३८ अर्ब ४२ करोड ९६ लाख ३२ हजार ७३० रुपैयाँ माग दाबी रहेको छ । जसमध्ये अझै ३४ अर्ब ७१ करोड ३० लाख २७ हजार ७६ रुपैयाँ फिर्ता गर्न बाँकी रहेको समितिका सदस्य सचिव केशव प्रसाद पौडेलले जानकारी दिए ।

व्यवस्थापनको ठोस तथा नतिजामुखी कार्ययोजना बनाई कार्यान्वयनको काम अघि बढाइएको समितिका अध्यक्ष श्रीमण कुमार गौतमले बताए । संचालक, व्यवस्थापकको नाममा रहेको चल÷अचल सम्पत्तिको खोजी गरी अचल सम्पत्तिको रोक्का गर्ने कार्य भएको र मूल्याङ्कन गरी लिलामीको प्रकृयालाई तिव्रता दिइएको समेत उनले बताए ।

‘समस्याग्रस्त घोषित संस्थाहरुका इच्छुक बचतकर्तालाई तेस्रो पक्षको सम्पत्तिबाट मिलान गरी व्यवस्थापन गर्ने कार्यको प्रारम्भ गरिएको छ’, अध्यक्ष गौतमले भने, ‘हालसम्म ३ वटा संस्थाको हिसाब राफसाफ भैसकेको छ । चालु आ.व. भित्र थप २ सहकारी संस्था राफसाफको हुने दिशातर्फ अगाडि बढेको ।’

पहिलो चरणमा मागदाबी गरेका बचत मागदाबीकर्ताको बचत फिर्तापछि मात्र दोस्रो चरणमा दाबी गरेका बचत मागदाबीकर्तालाई बचत फिर्ताको कार्यनीति रहेको उनले स्पष्ट पारे ।