‘बेलैमा लेखा समितिको क्षमता बढाउन सकेको भए धेरै संस्था दुर्घटनाबाट जोगिने थिए’

राष्ट्रिय सहकारी बैंक लिमिटेड सहकारी संघ/संस्थाहरुको प्रवर्द्धन, विकास एवम् बैंकिङ कारोवारको लागि सहकारी क्षेत्रको एक मात्र बैंक हो । बैंकसँग १६ हजारभन्दा बढी सहकारी आवद्ध छन् । हाम्रा सदस्य सहकारीका आ–आफ्नै समस्या छन् ।

सहकारी सञ्चालनमा मुख्य गरी तीनवटा कम्पोनेन्टको आवश्यकता पर्छन् । त्यो भनेको सहकारीको सञ्चालक समिति, कर्मचारी र लेखा समिति हो । कहिलेकाहीँ सहकारीको सञ्चालक समिति र कर्मचारी ट्रयाक भन्दा बाहिर जान सक्छ । यस्तो अवस्थामा हेर्ने भनेको लेखा सुपरिवेक्षण समितिले हो । संस्थाको लेखा समिति नै कमजोर र पछिपर्यो भने त्यो संस्थाको समग्र कार्यप्रगति वित्तीय प्रणाली ध्वस्त बन्न सक्छ ।

अहिले अधिकांश सहकारी संघ संस्थाहरूमा समस्या आनुको कारण पनि यहीँ हो । बेलैमा संस्थाको लेखा समितिको क्षमता बढाउन सकेको भए, बुझाउन र सिकाउन सकेको भए धेरै संस्था दुर्घटनाबाट जोगिने थिए । अर्को पक्ष भनेको सहकारीहरूको पनि साइज बढ्दै गएको छ । ठूलो वित्तीय कारोबार गर्ने संस्थाहरूको लेखा समिति, लेखा परीक्षण राम्रो र व्यवस्थित हुन सकेन भने अहिलेको भन्दा पनि ठूलो समस्या आउन सक्छ भन्ने लाग्यो ।

हामीले लेखा प्रणाली व्यवस्थित गर्ने र सिकाइ गर्ने उद्देश्यले राष्ट्रिय गोष्ठीको आयोजना गरेका हौँ । मुख्य त बचत तथा ऋणको कारोबार गर्ने र बढीभन्दा बढी वित्तीय कारोबार गर्ने संघ संस्थालाई नै टार्गेट गरेर यो गोष्ठीको आयोजना गरेका हौँ । यसमा देशैभरीबाट ४ सय देखि ५ सय लेखा समितिका सदस्य सहभागी हुन्छन् ।

(यही असोज २५ र २६ गते राष्ट्रिय सहकारी बैंक लिमिटेडले आयोजना गरेको लेखा सुपरिवेक्षण समितिको राष्ट्रिय गोष्ठी–२०८० बारेमा केन्द्रीत रहेर बैंकका प्रमुख कार्यकारी अधिकृत बद्री कुमार गुरागाईंसँग गरिएको कुराकानीमा आधारित)