को बन्ला नेफ्स्कूनको सिइओ, पोखरेलको दोहोरिने सम्भावना कति?

काठमाडौं : नेपाल बचत तथा ऋण केन्द्रीय सहकारी संघ (नेफ्स्कून) का प्रमुख कार्यकारी अधिकृत (सिइओ) प्रकाशप्रसाद पोखरेलको कार्यकाल यही महिना सकिदै छ । २०७६ असार १ गते नायव प्रमुख कार्यकारी अधिकृत पदमा नेफ्स्कून प्रवेश गरेका पोखरेल २०७७ साउन १ गते का.मु. सिइओमा नियुक्त भएका थिए । २०७८ मंसिरमा सिइओ बनेका पोखरेलको कार्यकाल यही महिना सकिदै छ ।
कार्यकाल सकिनै लाग्दा अब सिइओ को बन्ला भन्ने आम चासोको विषय बन्न पुगेको छ । पुनः पोखरेल दोहोरिने वा नयाँ प्रक्रियाबाट सिइओ नियुक्ती गर्ने भन्ने विषय नेफ्स्कून सञ्चालक समितिको बैठकमा भर पर्दछ । पोखरेलकै नियुक्तीमा सञ्चालक समिति भित्र तिब्र असन्तुष्टि थियो ।

नेफ्स्कूनले २०७८ असार ३० गते प्रमुख कार्यकारी अधिकृत पद (तह १०) मा खुला आवेदन माग गरेको थियो । साउन २२ गते छोटो सुचि नामवाली प्रकाशन गरेको थियो । उक्त छोटो सुचिमा ८ जना सफल भएका थिए । तर, परिक्षा दिएका मध्ये कोही पनि सफल हुन नसकेपछि सम्पूर्ण प्रक्रिया रद्द गरी सञ्चालक समितिले नयाँ ढंगबाट सिईओ नियुक्ती प्रक्रिया अघि बढाएको हो । सोही प्रक्रियाबाट पोखरेल सिइओ बनेका थिए ।

नेफ्स्कूनको बोर्ड बैठक असार २६ र २७ गते भक्तपुरको होटल भादगाउँ हुँदैछ । उक्त बैठकमा सिइओ नियुक्तीको एण्जेडा समेत राखिएको छैन । अघिल्लो पटक सिइओ नियुक्ती गर्दा विविध एजेण्डा भित्र राखेर निर्णय गरिएको थियो ।
पोखरेल २०७८ मंसिरमा सिइओ बनेका भएपनि नियुक्ती भने २०८० असार मसान्तसम्मको मात्रै दिईएको थियो । यस अघिका सिइओ शिवजी सापकोटाको कार्यकाल ५ वर्षको थियो ।

कार्यकाल सकिने मिति नजिकिदै गर्दा सिइओ पोखरेल बिदामा बसेका छन् । असार २६ र २७ गते हुने बैठकमा पोखरेलको सहभागिता समेत नहुने बुझिएको छ । अघिल्लो पटक पोखरेललाई सिइओ बनाउन लागि परेका अध्यक्ष परितोष पौड्याल यस पटक मौन छन् । स्रोतका अनुसार यस पटक पहिले जस्तो विवाद नहुने गरी सिइओ छनोट प्रक्रिया टुंग्याउने पक्षमा अध्यक्ष पौड्याल छन् । अघिल्लो पटक पोखरेललाई सिइओ बनाउन हुन्न भन्नेहरु यसपटक पनि सोही अडानमा रहेको बुझिएको छ ।