क्यान्सर पिडितलाई पोखरा रोयलको सहयोग, हिमकुमारी भन्छिन्, ‘बाँच्ने रहर छ

कास्की : पोखरा रोयल बचत तथा ऋण सहकारी संस्थाले संस्थाको लघु ऋण समूहमा आवद्ध सदस्य क्यान्सर पिडित हिमकुमारी आलेलाई ४५ हजार ५ सय ११ रुपैयाँ सहयोग गरेको छ ।

संस्थाका प्रमुख कार्यकारी अधिकृत भीम गुरुङ्ग, भण्डारढिक सेवाकेन्द्र व्यवस्थापन उपसमितिका संयोजक जंगबहादुर गुरुङ्ग लगायत संस्थाका अधिकारीको उपस्थितिमा नगद रकम र निजका छोरालाई स्टेशनरी सामान हस्तान्तरण गरेको भण्डारढिक सेवाकेन्द्र प्रमुख उमनाथ आचार्यले जानकारी दिए ।

३३ वर्ष पुगेकी आले विगत ४ वर्षदेखि पाठेघरको क्यान्सरले थलिएर ओछ्यानमा जिवन र मृत्युसंग लडिरहेकी छन् । उनको श्रीमान् २ वर्ष अगाडि मात्रै श्रीमतीकै उपचारमा संघर्ष गरिरहेकै बेला हृदयघातका कारण मृत्यु भएको थियो । त्यस पश्चात् भने उनी माईतीघरमा ७५ वर्षे बुबा ओमबहादुर आलेको साहरामा बस्दै आएकी छिन् । ७५ वर्षे बुबा पनि क्यान्सरबाट पिडित छन् ।

स्याँङ्गजाको समरसमा जन्मेकी हिम कुमारी हाल पोखरा २९ भण्डारढिक नयाँवस्तीमा बसोबास गर्दै आईरहेकी छिन् । आले विभिन्न संघ संस्था र आफन्तजनको सहयोग लिएर बिहान र बेलुकीको छाक टार्ने काम गरिरहेकी छिन् ।

हिमकुमारी आले भन्छिन्, ‘भएको पैसा सबै सकियो । सम्पत्ति पनि छैन । छोराको मुख हेरेर बसेकी छु । सरकारबाट एकपल्ट १ लाखको सहयोग बाहेक अरु प्राप्त गरेको छैन । धेर थोर सहयोग पाए केही दिन भएपनि बाँच्ने रहर छ ।’

पोखरा रोयल सहकारीले सदस्यहरुको सुख दुःखमा धेरथोर सहयोग गर्दै आईरहेको छ । सामुदायिक सेवा अन्तर्गत संस्थाले जन्मैदेखि मृत्यूसम्मका विविध घटना र परिस्थितिमा असाहाय र बिरमी सदस्यहरुलाई साथ र सहयोग गरिरहेको प्रमुख कार्यकारी अधिकृत भीम गुरुङ्गले बताए ।