सहकारीमा सञ्जाल सहकार्य र व्यवस्थापन आजको आवश्यकता : बागमती प्राेस्कून

काठमाडौं : बागमती प्रदेश बचत तथा ऋण सहकारी संघ (बागमती प्रोस्कून)ले ‘सञ्जाल सहकार्य र व्यवस्थापन आजको आवश्यक्ता’ विषयक अन्तरक्रिया साेमबार सम्पन्न गरेको छ । बागमती प्रदेश भित्रका बचत तथा ऋण सहकारी संघहरुको सञ्जाल व्यवस्थापन  र सञ्जाल सहकार्य सम्बन्धी साझा धारणा बनाउने उद्देश्यले अन्तरक्रिया आयोजना गरेको हो । गोष्ठीमा बागमती प्रदेशका १२ जिल्ला बचत तथा ऋण सहकारी संघको सहभागितामा रहेको थियो ।

बागमती प्रोस्कूनका अध्यक्ष उद्धव सापकोटाको अध्यक्षतामा सञ्चालित गोष्ठीमा नेपाल बचत तथा ऋण केन्द्रिय सहकारी संघ (नेफ्स्कून) का पूर्व प्रमुख कार्यकारी अधिकृत शिवजी सापकोटाले सहकारीमा सञ्जाल व्यवस्थापन र सहकार्यको महत्वको बारेमा प्रस्तुतिकरण गरेका थिए । प्रस्तुतीकरणमा सापकोटाले अष्ट्रेलिया र अमेरिकामा बाहेक अन्य देश सहकारीको जिम्मा सरकारले नलिएको बताए । कति संस्था संघमा आवद्ध भए भन्दा पनि कति संस्थालाई सुरक्षित तवरले सञ्चालन गर्न सकियाे त्यो महत्वपुर्ण भएको उनको भनाई थियाे ।

तोकिएको मापदण्ड पुरा गरेका संस्थाको सुरक्षाको प्रत्याभुति प्रोस्कूनले लिन्छ भन्न सक्नु अहिलेको आवश्यकता रहेको समेत उनले औंल्याए । सहकारीका संघ तथा महासंघ मार्गदर्शन र विज्ञप्ति निकाल्ने होडबाजीमा लागेको भन्दै उनले यसले मात्र सहकारीको समस्या समाधान नहुने प्रष्ट पारे । अहिलेको आवश्यकता स्फेसिफिक एजेन्डामा छलफल गर्ने र कार्यान्वयनको लागि संघ, प्रदेश र स्थानीय तहमा पहल गर्नु पर्ने उनको भनाई थियाे ।

त्यसैगरी बागमती प्रोस्कूनका प्रमुख कार्यकारी अधिकृत केशव प्रसाद दाहालले बागमती प्रदेशमा सञ्जाल सहकार्य र सञ्जाल व्यवस्थापनको विषयमा निर्धारण गरेको संरचना र सो मार्फत बचत तथा ऋण सहकारीको उदाहरणीय व्यवस्थापनमा संघको परिकल्पनाको विषयमा प्रस्तुतीकरण गरेका थिए ।

संघका महासचिव जिवसराज खड्काले सञ्चालन गरेको कार्यक्रममा उपाध्यक्ष कल्पना श्रेष्ठले स्वागत मन्तव्य राखेकी थिइन । बागमती प्रोस्कूनले कल्पना गरेको सञ्जाल व्यवस्थापन र सञ्जाल सहकार्यका विषयमा सहभागीहरुबीच खुल्ला छलफल समेत भएकाे थियो।