सहकारी माटोदेखि मुखसम्म जोडिनुपर्दछ: राष्ट्रिय सभा अध्यक्ष

काठमाडौं : राष्ट्रिय सभाका अध्यक्ष गणेश प्रसाद तिमिल्सिनाले सहकारी माटोदेखि मुखसम्म जोडिनुपर्ने बताएका छन् । सहकारी अर्थतन्त्रको एउटा खम्बा रहेकाले उत्पादन, ढुवानी, वितरण, उपभोगसम्म जोडिनुपर्ने उनको भनाई थियो । सहकारी मूल्य शृखला प्रभावकारी रुपमा उत्रिएको खण्डमा विचौलियाको अन्त्य हुने समेत बताए ।

राष्ट्रिय सहकारी महासंघको ३०औं वार्षिक साधारण सभाको उद्घाटन समारोहलाई सम्बोधन गर्दै तिमिल्सिनाले राज्यले सहकारीलाई उचित सम्बोधन गर्नुपर्ने बताए । ‘तीन खम्बे अर्थतन्त्र भन्ने र एउटा खम्बालाई चल्लाको खुट्टा जस्तो अर्काे खम्बालाई हात्तीको खुट्टा जस्तो बनाएर अर्थतन्त्र मजबुद हुँदैन’, उनले भन्नुभयो, ‘तीनवटै खम्बा बलियो बनाउने नीति तथा कार्यक्रम सरकारको हुनुपर्छ । त्यसलाई बजेटमा समावेश गर्न पनि कन्चुस्याई गर्नुहुँदैन ।’

गरिबी निवारणका लागि सहकारीको महत्वपूर्ण भूमिका हुने भएकाले सरकारले गरिबीको न्यूनिकरणका लागि सहकारीसँग सहकार्य गर्न सक्ने औल्याए । सहकारीमा ५६ प्रतिशत महिला सहभागिता भए पनि नेतृत्व तहमा त्यसको प्रभाव नदिएकाले नेतृत्वमा महिलाको सहभागिता बृद्धि गर्नुपर्नेमा पनि जोड दिए ।

कार्यक्रममा राष्ट्रिय सहकारी महासंघका निवर्तमान अध्यक्ष केशव बडालले स्वायत्तता र स्वतन्त्रता सहकारीको मुटु भएको बताउँदै राज्यसँग हालेमालो गरेर अभियान अगाडि बढ्ने बताए ।

महासंघका पूर्व अध्यक्ष दिपकप्रकाश बाँस्कोटाले नेपालको संविधानमा सार्वजनिक, निजीसरह सहकारीलाई समान अवसर दिएको र विश्वका विभिन्न देशले अनुशरण गर्न थालेको बताए ।

भूमि व्यवस्था, सहकारी तथा गरिवी निवारण मन्त्रालयका सचिव डा. दामोदर रेग्मीले मन्त्रालय र सहकारी अभियान एउटा डुङ्गामा उभिएकाले अभियान सफल हुँदा मन्त्रालय पनि सफल हुने बताए ।

‘सहकारी अभियानलाई भरोसायोग्य क्षेत्रका रुपमा रुपान्तरण गर्न हामी सबै लागि पछौं । जोखिम न्युनिकरण गर्दै जानुपर्ने छ’, उनले भने । सम्पत्ति शुद्धिकरण निवारणमा सहकारी अभियानले प्रतिबद्धता व्यक्त गर्ने विश्वास समेत व्यक्त गरे ।
सहकारी विभागका रजिष्ट्रार रुद्रप्रसाद पण्डितले सहकारी एकीकरणलाई अभियानका रुपमा अगाडि बढाउनुपर्ने बताए । ‘सहकारीको सुदृढिकरणका लागि केन्द्रीय संघहरुबाट विभागले काम थाल्ने समेत बताए । अभियानको सरकारको परनिर्भरता घटाउँनका लागि महासंघले वैज्ञानिक शुल्क निर्धारण गरेकोमा स्वागत गरे ।

महासंघका अध्यक्ष मिनराज कडेलले सहकारी अभियानले दिगो विकासका लक्ष्यहरु प्राप्तिका लागि योगदान गर्ने बताए । वर्तमान अवस्थामा सहकारीलाई तरलता व्यवस्थापनमा राज्यलाई सहयोग गर्नुपर्ने समेत बताए ।