स्थिरीकरण कोषबाट २ वटा सहकारी संस्थाले पायो तरलता सापटी

काठमाडौं : बचत तथा ऋण सहकारी संस्था सम्बन्धी स्थिरीकरण कोषले २ वटा सहकारी संस्थालाई तरलता सापटी प्रदान गरेको छ ।

तरलता सापटी पाउने संस्थामा डाँफे बचत तथा ऋण सहकारी संस्था लि. झापा र श्री माई बज्रबाराही बचत तथा ऋण सहकारी संस्था लि. ललितपुर रहेका छन् ।

कोषको आज काठमाडौंमा सम्पन्न पहिलो बार्षिक परामर्श बैठकबाट ती संस्थालाई तरलता सापटी प्रदान गरेको हो । डाँफे साकोसले ९० लाख रुपैयाँ र श्री माई बज्रबाराही साकोसले ३० लाख रुपैयाँ तरलता सापटी पाएका छन् ।

बचत तथा ऋण सहकारी संस्था सम्बन्धी स्थिरीकरण कोष स्थापना तथा सञ्चालन कार्यविधि २०७६ को दफा ८ बमोजिम सहभागिता योग्यता पुगेका सहकारी संस्थाहरु मध्येबाट दफा २३ बमोजिम कोषले तरलता सापटी प्रदान गरेको हो । भूमि व्यवस्था, सहकारी तथा गरिबी निवारण मन्त्रालयका सचिव डा. दामोदर रेग्मी र राष्ट्रिय सहकारी महासंघका अध्यक्ष मिनराज कडेलले संयुक्त रुपमा ती संस्थालाई सापटी रकम हस्तान्तरण गरेका हुन् ।

आर्थिक वर्ष २०७८/०७९ सम्ममा २ सय ६२ सहकारी संस्थाले कोषमा योगदान गरेका छन् । ती संस्थाले ११ करोड ३६ लाख ११ हजार १ सय ३९ रुपैयाँ कोषमा योगदान गरेका छन् । चालु आर्थिक वर्षमा थप ९ वटा सहकारी संस्थाले कोषमा योगदान गरेका छन् । हालसम्म कोषमा योगदान गर्ने सहकारी संस्थाको संख्या २ सय ७१ पुगेका छन् ।

२०७९ जेठ २७ गते २ सय ६२ संस्थाहरुको सहभागितामा भूमि व्यवस्था, सहकारी तथा गरिबी निवारण मन्त्रालयको मन्त्रीस्तरीय निर्णयबाट कोषको स्थापना भएको थियो ।