फेवा सहकारीले बनायो ४ वर्षे रणनीति, निक्षेप लक्ष्य २ अर्ब ५० करोड

पोखरा : फेवा बचत तथा ऋण सहकारी संस्थाले रणनीतिक योजना तर्जुमा गोष्ठी सम्पन्न गरेको छ । संस्थाले २४ औं वार्षिकोत्सवको अवसरमा कास्की जिल्लाको माछापुच्छ्रे गाउँपालिका वडा नम्बर ७ धम्पुषमा दुई दिने गोष्ठीको आयोजना गरेको हो । गोष्ठीको उद्घाटन गर्दै पोखरा महानगरपालिका वडा नम्बर २३ का अध्यक्ष रामकाजी गुरुङले सहकारीको विकासका लागि आफ्नो तर्फबाट सहयोग गर्ने प्रतिवद्धता व्यक्त गरेका थिए ।

२०५६ सालमा स्थापित फेवाले सदस्यलाई कसरी राम्रो सेवा प्रदान गर्ने?, के गर्दा शेयर सदस्यहरु लाभान्वित हुन्छन्?, आगामी दिनमा सहकारीलाई कसरी अगाडि बढाउने भन्ने बारेमा सहकारीका सञ्चालक, विभिनन उपसमिति र कर्मचारीहरूलाई सहभागी गराई रणनीतिक योजना गोष्ठी गरेको हो ।

गोष्ठीमा मुख्य प्रशिक्षक कुवेर निरौलाले सहकारीका नीति, नियम कानुन र सहकारीलाई कसरी व्यवस्थित र व्यवस्थापन गर्न सकिन्छ, आगामी ४ वर्षमा अपनाउनुपर्ने रणनीतिको बारेमा प्रशिक्षण दिएका थिए । गोष्ठीमा संस्थाका प्रमुख कार्यकारी अधिकृत हरिभक्त पौडेलले २०५६ सालदेखि २०७९ सालसम्म संस्थाको कारोबारका बारेमा जानकारी दिँदै स्थापनादेखि अहिले सम्मको फेवा सहकारीको स्थितीको बारेमा जानकारी गराएका थिए ।

फेवा सहकारीका सल्लाहकार तथा सामाजिक अभियन्ता महेश गुरुङले सहकारीलाई फुलबारीको रुपमा लिनुपर्ने बताउँदै देशमा हाल बैंकिङ कारोबार ठप्प रही आर्थिक मन्दी बढिरहँदा सहकारी सबैको साझा बनाउनु पर्नेमा जोड दिए ।
हाल संस्थामा सदस्यको १ अर्ब निक्षेप रहेको छ । त्यस्तै संस्थाको कारोबार १ अर्ब ३० करोड रहेको छ । आगामी ४ वर्षमा २ अर्ब ५० करोड निक्षेप र ३ अर्बको कारोबार पुर्याउने लक्ष्य संस्थाले राखेको छ ।

उक्त गोष्ठी सफल बनाउन सञ्चालक समिति, सस्थाका प्रबन्धक जगन तिमल्सिना, राम बजार सोसाइटी यूकेका पुर्व अध्यक्ष रूपक गुरुङ, भद्रकाली सेवा केन्द्रका संयोजक क्या. श्याम बहादुर गुरुङ र विभिन्न उप समितिका सदस्य समेत कर्मचारीहरूको सहभागितामा रहेको थियो ।

संस्थाका अध्यक्ष क्याप्टेन चन्द्र प्रसाद गुरुङको अध्यक्षतामा सम्पन्न कार्यक्रममा कार्यक्रम संयोजक तथा उपाध्यक्ष सम्मर बहादुर श्रेष्ठले स्वागत मन्तब्य राखेका थिए भने कार्यक्रमको सञ्चालन सचिव दिल बहादुर भट्टराइले गरेका थिए ।