राष्ट्रिय सहकारी बैंकमा मनोज कुमार थापा किन?

काठमाडौं : राष्ट्रिय सहकारी बैंकको आसन्न निर्वाचनमा सञ्चालक समिति सदस्य (खुला) पदका उम्मेदवार हुन् मनोज कुमार थापा मगर । उनको उम्मेदवारी परेसँगै सहकारी क्षेत्रमा नयाँ तरंग समेत ल्याएको छ । राष्ट्रिय सहकारी बैंकलाई मनोज जत्तिको मानिस चाहिन्छ भन्ने जमात बाक्लो छ ।

पुस १६ गते हुने बैंकको निर्वाचन सहितको १९ औं साधारण सभामा तपाई हाम्रो बहुउद्देश्यीय सहकारी संस्था लिमिटेड नैकाप काठमाडौंको प्रतिनिधित्व गर्दै उम्मेदवारी दिएका हुन् । उनी जिल्ला बहुउद्देयीय सहकारी संघ काठमाडौंका पनि अध्यक्ष हुन् । १७ वर्षदेखि सहकारी अभियानमा क्रियाशिल उनी राष्ट्रिय सहकारी बैंक कलंकी शाखाका संयोजक समेत हुन् । थापा के.बी. उप्रेतीको संयुक्त प्यानलका तर्फका आधिकारिक उमेदवार हुन् ।

थापासँग व्यवस्थापनको ज्ञान र सहकारी क्षेत्रको अनुभव दुबै छ । आफुले सँगालेको ज्ञान, अनुभव र क्षमतालाई उपयोग गरी सहकारी बैंकलाई थप उचाईमा लैजाने सोंचका साथ उम्मेदवारी दिएको बताउँछन् ।

राष्ट्रिय सहकारी बैंकलाई नयाँ भिजन तथा मिसन दिनुका साथै वित्तीय विश्लेषण गरेर नयाँ ढंगले लैजाने व्यक्तिको बैंकमा आवश्यकता महशुस भएको र सोही कारण उम्मेदवारी दिएको उनी बताउँछन् । ‘सहकारीलाई वित्तीय सेवाका अतिरिक्त लबिङ तथा एड्भोकेसी, ब्राण्डिङ, क्षमता विकासका कार्यक्रमहरु आवश्यक छन्’, उनी भन्छन्, ‘सहकारी क्षेत्रलाई मर्यादित, व्यवस्थित बनाउन धेरै काम गर्न बाँकी छ । बैंकको नेतृत्वमा रहेर यी सबै काम गर्नको लागि अघि बढेको छु । त्यस्तै बैंकलाई अझै सबल, सक्षम र व्यवस्थित बनाउने कुरामा मेरो ध्यान जानेछ ।’

मानव संशाधनको वृत्ति विकासका साथ साथै सहकारी क्षेत्रको बलियो बैंक बनाउन आफ्नो तर्फबाट योगदान पुर्याउने उनको योजना छ । हाल कतिपय सहकारी संस्थामा तरलता तथा व्यवस्थापकीय लगायतका समस्याहरु देखिएको र बैंकको प्रतिनिधित्व गर्दै समस्या समाधानमा महत्वपूर्ण भूमिका निर्वाह गर्न सक्छु भनेरै उम्मेदवारी दिएको थापाको भनाई छ ।