सहकारीलाई सल्लाह सुझाव दिनेदेखि वित्तीय सहयोगसम्म महासंघले गर्ने

काठमाडौं : सहकारी संस्थाहरुमा देखिएको समस्या समाधानको लागि राष्ट्रिय सहकारी महासंघले गठन गरेको समितिले पहल गर्ने भएको छ । समितिले समस्यामा रहेको संस्थाहरुबाट निवेदन नै लिएर अनुगमन गर्ने, समाधानका लागि सल्लाह सुझाव दिनेदेखि वित्तीय सहयोग गर्नेसम्मको तयारी गरेको छ ।

महासंघको मंसिर १५ गते बसेको बोर्ड बैठकले समस्या उन्मुख संस्थाहरुको स्थलगत अध्ययन, विश्लेषण, समन्वय गर्ने जिम्मेवारी सहित संचालक केबी उप्रेतीको संयोजकत्वमा समिति बनाएको थियो । समितिको पहिलो बैठकले समस्या र समाधानको उपाय पहिल्याउँदै सुझाव दिने गरी प्राविधि उपसमिति समेत गठन गरेको छ ।

उपसमितिले बनाएको रणनीतिमा समितिमार्फत समस्या समाधानको योजनामा समस्याउन्मुख संस्थाबाट निवेदन लिने, त्यसपछि संस्थाको अनुगमन गर्ने, समाधानका लागि राय सल्लाह दिने तथा आवश्यक परेमा वित्तीय सहयोग समेत गर्ने प्रावधान राखिएको एक सदस्यले बताए ।

समितिको सहजिकरणमा समस्या समाधान हुन नसकेमा आवश्यक कारवाही अगाडी बढाउनका लागि सरकारी निकायमा सिफारीस गर्ने व्यवस्था पनि गरिएको छ । त्यसैरी समस्याउन्मुख संस्थाको स्थलगत अनुगमन गर्ने गरी विज्ञसहितको प्राविधिक समिति बनाउने प्रस्ताव पनि गरिएको छ ।

समितिका संयोजक केबी उप्रेतीले केही संस्थाहरुमा आंशिक समस्या देखिएको भएपनि समाधान उन्मुख रहेको बताए । ‘केही संस्थाको आंशिक समस्याले गर्दा अन्य सहकारीमा असर पर्ने देखिएको छ’, उनले भने, ‘सदस्यहरु हल्लाको पछि लाग्नु भएन ।’