सबैको साकोसको ४ वर्षे रणनीतिक योजना : ३ अर्ब पुँजी र १२ हजार सदस्य

तिलोत्तमा, रुपन्देही : सबैको बचत तथा ऋण सहकारी संस्था लि. तिलोत्तमा ५, रुपन्देहीको चार वर्षे रणनीतिक व्यावसायिक योजना कार्यशाला सम्पन्न भएको छ ।

गत वर्ष ११ वटा सहकारी संस्थाहरु एकीकृत भई सञ्चालनमा आएको सहकारी संस्थाले पहिलो रणनीतिक योजना तर्जुमा गरेको हो ।

गत वर्ष नेफ्स्कुनबाट एकीकरण विधामा उत्कृष्ट घोषित सहकारी संस्थाले बृहत एकीकरण र आन्तरिक व्यवस्थापन गर्दै संस्थालाई अझ सवल र शसक्त बनाउने योजना तय गरेको छ ।

हाल १ अर्ब कुल पुँजी भएको सहकारी संस्थाले आगामी ४ वर्षमा कुल ३ अर्ब पुँजी र १२ हजार सदस्य बनाउने लक्ष सहितको रणनीति तय गरेको छ । ८ वटा सेवा केन्द्र र १ मुख्य कार्यालयसहित ९ स्थानबाट सेवा प्रवाह गरिहरेको संस्थाका सञ्चालक समिति, लेखा सुपरीवेक्षण समिति, सल्लाहकार, सेवाकेन्द्र व्यवस्थापन उपसमिति तथा विभिन्न उपसमिति सदस्यहरु सहभागी कार्यशाला भाद्र १० र ११ गते सञ्चालन भएको थियो ।

सहकारी संस्थाको दिगो विकास र विस्तार एवं पूर्ण रुपले सदस्य केन्द्रित सहकारी र सदस्य मैत्री कारोवार एवं व्यवहारका लागि यो रणनैतिक योजना महत्वपूर्ण हुने सहकारी सदस्य प्रा.डा. गणेश पाठकले जानकारी दिनु भयो । संस्थाले “ब्यवस्थित संस्था : स्तरीय सेवा” सेवा भन्ने परिकल्पना अगाडि सारेको छ ।

हाल ५ हजार ८ सय ७० जना सदस्य रहेको सबैको सहकारी बचत तथा ऋण सहकारी संस्थाले निकट भविष्यमै स्तरिकरण कार्यक्रममा सहभागि हुने समेत योजनामा उल्लेख गरेको छ । सदस्यको सन्तुष्टि र आन्तरिक सुशासनमा मात्र सहकारीको विकास संभव भएको कुरा सल्लाहकार प्रा.डा. रामचन्द्र आचार्यले बताउनु भयो ।

रणनैतिक योजना तयारी कार्यशालाको सहजिकरण नेफ्स्कुनका पूर्व प्रमुख कार्यकारी अधिकृत शिवजी सापकोटाले गर्नुभएको थियो । संस्थाका अध्यक्ष भरत भूसालको अध्यक्षतामा सञ्चालित कार्यशालामा ५० जना सहभागी थिए ।