सहकारीमा सम्पत्ति सुद्धिकरण सम्बन्धी उच्च जोखिम, त्यस्ता सहकारीलाई कारबाही गर्नुः महालेखा

काठमाडौं : सहकारीका नियमनकारी निकायको भूमिका कमजोर भएको महालेखाले जनाएको छ ।

सहकारी संस्था माथीको नियमनकारी भूमिका प्रभावकारी नभएका कारण सम्पत्ति शुद्धिकरणसम्बन्धी जोखिम विद्यमान रहेको निष्र्कष महालेखापरीक्षको कार्यालयको छ ।

नमुना छनौट गरिएका १४ वटा बचत तथा ऋण सहकारी संस्थाको निरीक्षण प्रतिवेदन अनुसार जोखिम व्यवस्थापन नगरेको, शंकास्पद कारोबारको पहिचान गर्ने प्रणाली नराखेको, सदस्यको उच्च र असामान्य आर्थिक कारोबारको सुक्ष्म अध्ययन नगरेको लगायतको व्यवहोरा उल्लेख छ ।

सहकारी विभागले निरीक्षण पश्चात स्पष्टीकरण माग गरी सुधारको कार्य योजना पेस गर्न लगाए पनि कार्यान्वयनको अवस्था यकिन नगरेकोमा महालेखाले प्रश्न उठाएको छ ।

महालेखापरीक्षको ५९ औं वार्षिक प्रतिवेदन अनुसार यस्ता सहकारीलाई कारबाही नगरेको भन्दै प्रचलित कानुन अनुसार कारबाही गर्न विभागलाई निर्देशन दिएको छ ।

सम्पत्ति शुद्धिकरण निवारण सम्बन्धी सहकारी संघ संस्थालाईहरुलाई जारी गरिएको निर्देशन, २०७४ को दफा ३२ मा सम्पत्ति शुद्धिकरणसम्बन्धी व्यवस्थाहरुको कार्यान्वयन नगर्ने संस्थालाई लिखित रुपमा सचेत गराउने, अटेर गर्नेलाई १० लाख देखि ५ करोडसम्म जरिवाना गर्ने एवं दर्ता खारेजसम्म गर्न सक्ने उल्लेख छ ।