देउराली बहुउद्देश्यीय सहकारी आर्थिक संकटमा, सूचना टाँसेर कारोबार बन्द

ललितपुर : ललितपुरको सात दोबाटोमा प्रधान कार्यालय रहेको देउराली बहुउद्देश्यीय सहकारी संस्थाले कारोबार बन्द गरेको छ ।

लामो समयदेखि तरलता अभाव झेलिरहेको संस्थाले आज सूचना नै जारी गरी कारोबार बन्द गरेको हो । संस्थाले निकालेको सूचनामा शुक्रबारसम्मलाई आर्थिक कारोबार बन्द गरिएको भनिएको छ ।

विगत लामो समयदेखि संस्थाले बचत फिर्ता गर्न नसकेको सदस्यहरुले बताएका छन् । संस्थाले आर्कषक ब्याजदर दिएर निक्षेप तथा बचत संकलन गर्दै आएको थियो । सहकारी विभागले कर्जामा तोकेको अधिकतम् व्याजदरभन्दा बढी संस्थाले बचतमा दिएको थियो ।

केही दिनदेखि संस्थाले बढीमा २५ हजार रुपैयाँसम्म मात्र बचत फिर्ता गरेको थियो । संस्था संकटमा रहेको जानकारी सदस्यहरुले यस अघि नै पाएका थिए ।

संस्थाको कुल वासलात करिब ३ अर्ब रुपैयाँ रहेको छ । सदस्यहरुबाट उठाएको अघिकांश बचत सञ्चालनले आफै चलाएको सदस्यहरुको आरोप छ ।