पोखरा रोयलका सदस्यलाई स्वास्थ्य सचेतना र सहकारी शिक्षा

कास्की : पोखरा रोयल बचत तथा ऋण सहकारी संस्थाले आफ्ना सदस्यहरुलाई एक दिवसीय स्वास्थ्य सचेतना एवं सहकारी शिक्षा तालिम दिएको छ ।

संस्थाका कोषाध्यक्ष एवं शिक्षा उपसमिति संयोजक गिरबहादुर श्रेष्ठको अध्यक्षतामा भएको कार्यक्रममा संस्थाको विभिन्न गतिविधि सहितको सदस्य शिक्षा तालिम मोहोरिया सेवा केन्द्र प्रमुख परमेश्वर दाहालले दिनुभएको थियो ।

स्वास्थ्य सचेतना विषयमा रहेर विभिन्न समय र परिस्थितिमा सिर्जना हुने रोगहरुका लक्षणहरु र उपचारको बारेमा संस्थाका सल्लाहकार वरिष्ठ चिकित्सक डा. कालु शर्मा सुवेदीले प्रशिक्षण दिनुभएको थियो ।

कार्यक्रममा डा. सुवेदीले विशेषगरी महिलाहरुमा हुने स्तन क्यान्सर र पाठेघरको क्यान्सरबाट जोगिने विधी, कोरोना कालमा अपनाउनुपर्ने जीवनशैली र खानपानको बारेमा सहजीकरण गर्नुभएको थियो । कार्यक्रममा मोहोरिया सेवाकेन्द्र व्यवस्थापन उपसमिती संयोजक उमा परियार र व्यवस्थापन उपसमिती सदस्य पूर्णिमा अधिकारीकोे समेत उपस्थिति रहेको थियो ।

संस्थाका मूख्य प्रबन्धक मीलन ढकालले स्वागत मन्तव्य दिनुभएको थियो भने कार्यक्रम सञ्चालन मोहोरिया सेवा केन्द्र व्यवस्थापन उपसमिती सदस्य सरिता अधिकारी लामिछानेले गर्नुभएको थियो ।