आयकरको दर यथावत राख्न माग, नभए थप कदम चाल्छौंः सहकारी महासंघ

काठमाडौं : आर्थिक वर्ष २०७९/०८० को बजेटमार्फत सरकारले सहकारीमा लाग्ने आयकरको दर बढाएपछि सहकारी अभियानले विरोध जनाएको छ ।

राष्ट्रिय सहकारी महासंघले मंगलबार (आज) एक विज्ञप्ति जारी गर्दै आयकरको दर यथावत नै राख्न माग गरेको हो । आयकर दर वृद्धि गर्न न्यायोचित नभएकाले यथावत नै राख्न नेपाल सरकार, संघीय संसद एवं सम्बद्ध पक्षमा महासंघले जोडदार माग गरेको छ ।

महासंघका अध्यक्ष मिनराज कडेलले विज्ञप्ति जारी गर्दै आयकरको दर यथावत नै नभएको अवस्थामा सहकारी अभियान थप कदम चाल्न बाध्य हुने जनाएको छ ।

सरकारले आयकर ऐन शंसोधन गरी सहकारीलाई लाग्ने आयकरको दरमा हेरफेर गरेको थियो । नगरपालिका क्षेत्रमा सञ्चालित सहकारीलाई ७.५ प्रतिशत, उपमहानगर पालिकामा १० प्रतिशत र महानगरपालिकामा सञ्चालित सहकारीलाई १५ प्रतिशत आयकर लाग्ने व्यवस्था गरेको थियो । यस अघि क्रमशः ५, ७ र १० प्रतिशत आयकर लाग्दै आएको थियो ।

सरकारले आर्थिक विधेयकमार्फत पारित गरेका करका दरहरु सामान्यतया संशोधन हुँदैन ।