भक्तपुरमा सहकारी चोरीका दुई घटना !

काठमाडौं : पछिल्लो समय सहकारी संस्थाहरुमा चोरीका घटनाहरु बढ्दै गएको छ । विशेष गरी काठमाडौं उपत्यका यस्ता घटना धेरै हुने गरेको प्रहरीले जनाएको छ ।

पौष महिनामा मात्रै भक्तपुरको दुई वटा सहकारीमा चोरी भएको छ ।

पौष १ गते राती मध्यपुरठिमी नगरपालिका १ लोकन्थलीस्थित दक्षिणकाली महिला बचत तथा ऋण सहकारीमा चोरी भएको भएको थियो ।

उक्त संस्थाबाट नगद ७ लाख ५ हजार रुपैयाँ चोरी भएको प्रहरीले जनाएको छ । संस्थाको मेन गेटको ताला फुटाई प्रवेश गरी दराजभित्र राखेको उक्त नगद चोरी भएको हो । यस विषयमा महानगरीय प्रहरी वृत्त ठिमीले चोरीमा संलग्न हाल फरार व्यक्तिहरुको खोजी गर्नुका साथै यस सम्बन्धमा आवश्यक अनुसन्धान गरिरहेको छ ।

त्यस्तै पौष १८ गते राति सूर्यविनायक नगरपालिका ८ गणेश मन्दिर नजिकै रहेको अमिताभ बुद्ध बचत तथा ऋण सहकारी संस्थामा पनि चोरी भयो । उक्त संस्थाबाट नगद ९ लाख २९ हजार ३ सय ३१ रुपैयाँ चोरी भएको प्रहरीले जनाएको छ ।

यस चोरीको घटनामा महानगरीय प्रहरी वृत्त जगातीले चोरीमा संलग्न फरार व्यक्तिहरूको खोजी गर्नुको साथै यस सम्बन्धमा थप अनुसन्धान गरिरहेको छ ।