सहकारीको ब्याजदर पुनरावलोकन गर्न आधार पुगेन

काठमाडौं : सहकारीको सन्दर्भ ब्याजदर (रेफेरेन्स इन्टेरेस्ट रेट) निर्धारण तथा सिफारिस समितिको आज बिहान बसेको बैठक विना निष्कर्ष टुंगिएको छ । ब्याजदर बढाउन आधार नपुगेपछि बैठक पुनः २१ गते बस्नेगरी टुंगिएको हो ।

सहकारी अभियानको तर्फबाट ब्याजदर बढाउन दबाब रहेपनि बढाउने आधार नभेटिएपछि ब्याजदर पुनरावलोकन हुन नसकेको हो ।

समितिका सदस्य तथा राष्ट्रिय सहकारी बैंकका अध्यक्ष केबी उप्रेतीका अनुसार आजको बैठकमा ब्याजदर बढाउन केही आधार नपुगेको र बजार बिश्लेषणपछि मात्र ब्याजदर पुनरावलोकन हुने बताउनुभयो ।

सहकारी ऐन २०७४ को दफा ५१ र सहकारी नियमावलीको नियम २३ मा तोकिएका आधार र सामान्य भार समेतका आधारमा हाल कायम भएको १४.७५ प्रतिशतबाट ब्याजदर नबढ्ने देखिएपछि आज तय हुन नसकेको हो ।

बैठकमा समितिका संयोजक तथा सहकारी विभागका रजिष्ट्रार झलक राम अधिकारी ब्याजदर बढाउन नसकिने बताउनुभएको थियो । हाल कायम भएको ब्याजदरबाट नबढ्ने उहाँले प्रष्ट पार्नुभएको थियो । अर्थ मन्त्रालय, नेपाल राष्ट्र बैंक ब्याजदर नबढाउने पक्षमा देखिएको छ ।

सहकारी ऐन २०७४ को दफा ५१ र सहकारी नियमावलीको नियम २३ मा तोकिएका आधार अनुसार बजार अध्ययन गर्दा १३ प्रतिशतको हाराहारीमा आएको छ । सहकारी अभियानले भने समिति समक्ष १७ प्रतिशत पुर्याउन प्रस्ताव गरेको छ ।