कोअपरेटिभ्ज् यूरोपको बोर्ड बैठक कोपनहेगनमा

युराेप : कोअपरेटिभ्ज् युरोपको सञ्चालक समितिको बैठक हिजो र आज डेनमार्कको राजधानी कोपनहेगनमा जारी छ ।

हिजो सुरु भएको बैठकमा सहकारी शिक्षा, अनुसन्धान, प्रविधि, लैङ्गिक समावेशिता तथा युवा सहभागिता लगायतका विषयमा समेत सघन छलफल भई आज सकिने कार्यक्रम छ । यो पटकको बैठक पनि हाइब्रिड मोडलमा बसेको छ । धरै सञ्चालकहरु भौतिक रुपमै उपस्थित भएपनि केहीले भर्चुअल सहभागिता जनाएका छन् । कोअपरेटिभ्ज् युरोप अन्तर्राष्ट्रिय सहकारी महासंघको युरोप हेर्ने क्षेत्रीय निकाय हो जसको मुख्य कार्यालय बेल्जियमको राजधानी ब्रसेल्समा अवस्थित छ ।

कोअपरेटिभ्ज् यूरोपको नेतृत्व परिवर्तन भएसँगै हाल जारी सञ्चालक समितिको बैठकलाई महत्वका साथ हेरिएको छ । कोप्स् युरोपको २४ सेप्टेम्बर २०२१ मा फ्रान्सको राजधानी पेरिसमा सम्पन्न भर्चुअल साधारण सभाले डेनिस सहकारी अभियन्ता सुसान वेस्थाउसिनको अध्यक्षतामा नयाँ सञ्चालक समिति निर्वाचित गरेको थियो । सन् २०१७ देखि आइसीए ग्लोबल बोर्ड सञ्चालक रहेकी वेस्थाउसिन सन् २००७ देखि डेनमार्कको कोपरेशनिन् (Kooperationen) कि अध्यक्ष छिन् । उनी अघि जिन लुइस ब्यान्सल कोप्स् युरोपका अध्यक्ष थिए ।

युरोपेली मुलुकहरुको सहकारी आवाज कोअपरेटिभ्ज् यूरोपमा हाल ३३ मुलुकका ८४ सहकारी संघ संस्थाहरु सदस्य छन् । युरोपको केन्द्रीय सहकारी निकाय अन्तर्गत १ लाख ७६ हजार प्रारम्भिक सहकारी संस्थाका १४१ मिलियन व्यक्तिगत सदस्यहरु अटाएका छन् । यी सहकारीहरुले ४७ लाख युरोपेलीहरुलाई प्रत्यक्ष रोजगारी प्रदान गरेको छ । कोअपरेटिभ्ज् यूकेमार्फत सहकारी प्रारुपको व्यवसाय प्रवर्धनका लागि तालिम शिक्षा र बहसपैरवीका काम हुँदै आएको छ ।

युरोपेलीहरुको संगठन–युरोपेली संघ (इयू) मुलुकहरुमा प्रत्येक ५ नागरिकमा १ जना सहकारीका सदस्य रहेको पछिल्लो तथ्याङ्कले देखाउँदछ ।