नेफ्स्कून र बाँके जिल्ला बचत संघबीच साझेदारी कार्यक्रममा सम्झौता

बाँके :  नेपाल बचत तथा ऋण केन्द्रीय सहकारी संघ (नेफ्स्कून) र बाँके जिल्ला बचत संघबीच साझेदारी कार्यक्रममा सम्झौता भएको छ । नेफ्स्कून–जिल्ला बचत संघ साझेदारी कार्यक्रममा नेफ्स्कूनका महासचिव दामोदर अधिकारी र जिल्ला बचत संघ बाँकेका अध्यक्ष प्रकाश ज्ञवालीले हस्ताक्षर गर्नुभएको थियो । केही समय अघि जिल्ला बचत संघ रौतहटसँग पनि जिल्ला संघ साझेदारी सम्झौता भएको थियो ।

बिहीबार भएको कार्यक्रममा नेफ्स्कूनका महासचिव दामोदर अधिकारीले साझेदारीमार्फत बचत तथा ऋण सहकारी सञ्चालनमा प्रभावकारिता ल्याउन, आबद्ध सदस्य संस्थाहरुलाई प्रदान गरिने तालिम शिक्षा तथा सेवाहरुमा एकरुपता ल्याउन र साकोस अभियानको पहुँच जिल्ला संघमार्फत स्थानीय स्तरसम्म अभिवृद्धि गर्न सहयोग पुग्ने विचार व्यक्त गर्नुभयो ।

उहाँले अभियान सुदृढीकरण तथा सञ्जाल क्षमता विकास गरी सहकारी ऐन तथा नियमावली बमोजिम नेफ्स्कून र जिल्ला बचत संघबीच व्यावसायिक एकरुपताका साथै स्थानीय जिल्ला संघहरुलाई उत्तरदायी बनाउँदै सुशासन स्थापना गर्न साझेदारी कार्यक्रम महत्वपूर्ण हुने बताउनुभयो । उक्त कार्यक्रममा नेफ्स्कूनका ब्यवस्थापन उप–समिति सदस्यहरु बचत संघका पदाधिकारीहरु सहित नेफ्स्कून नेपालगंजका फिल्ड कार्यालय इन्चार्ज यम बहादुर डाँगीको उपस्थिति थियो ।