एभरेष्ट कोपको नाममा चामल उत्पादन गर्दै एभरेष्ट कृषि सहकारी

काठमाडौं : एभरेष्ट कृषि सहकारी संस्था लि. बाँकेले एभरेष्ट कोपको नाममा विभिन्न प्रकारका चामलहरू उत्पादन गरी विक्रीवितरण गरिरहेको छ ।

संस्थाका अध्यक्ष देव बहादुर के.सी.का अनुसार हालसम्म ११ हजार ४ सय क्वीण्टल सदस्यहरूको धान खरिद गरिसके छ । संस्थाले सहकारी विभागको समेत सहयोगमा राइस मिल संचालन गरेको छ । परियोजनाको कूल लागत ५ करोड २२ लाखको रहेको छ । जसमध्ये २ करोड २२ लाखको जग्गा, भवन र मेशिन खरिद भएको र ३ करोड संचालन पूँजी रहेको संस्थाका अध्यक्षले बताउनुभयो । संस्थाले उत्पादन गरेको चामल सस्तो र गुणस्तरीय भएको अध्यक्ष के.सी.ले दावी गर्नुभयो ।

राष्ट्रिय सहकारी महासंघका वरिष्ठ उपाध्यक्ष ओमदेवी मल्ल, लुम्विनी प्रदेश सहकारी संघका अध्यक्ष प्रेम सुवेदी र महासंघका महाप्रवन्धक चित्रा कुमारी थाम्सुहाड सुव्वाले पौष ४ गते संस्थाले सञ्चालन गरेको धान प्रशोधन उद्योगको स्थलगत अवलोकन गरेको छ ।

वित्तीय सेवाका साथै सुपथ मूल्य पसल र रासायनिक मल वीउ विक्री वितरण गर्दै आएको उक्त संस्थाको अध्ययन गरेपछि महासंघका वरिष्ठ उपाध्यक्ष मल्लले सहकारीहरू उत्पादन, प्रशोधन, वजारीकरण र वितरणमा गएकोमा खुसी व्यक्त गर्नुभयो । महाप्रवन्धक थाम्सुहाडले अन्य संस्थाका लागि सिकाईयोग्य कार्य भएको बताउनुभयो ।