एक हजारमै सहकारी बैंकको सदस्यता

काठमाडौं, ३० बैशाख

अब एक हजार रुपैयाँमै राष्ट्रिय सहकारी बैंकको सदस्यता लिन पाईने भएको छ ।

बैंक सञ्चालक समितिको निर्णय अनुसार सदस्यता लिनको लागि कम्तीमा एक हजार रुपैयाँको सेयर खरिद गरे पुग्ने भएको हो । त्यस्तै प्रवेश शुल्क वापत पाँच सय रुपैयाँ लाग्ने बैंकले जनाएको छ ।
यस अघि बैंकको सदस्यता लिनको लागि कम्तीमा १० हजार रुपैयाँको सेयर खरिद गर्नुपर्ने व्यवस्था थियो ।

यो निर्णयले साना पुँजी भएका सहकारी संस्था पनि सदस्य बन्न पाउने बैंकका प्रमुख कार्यकारी अधिकृत बद्री गुँरागाईले जानकारी दिनुभयो । कम्तीमा १ हजार रुपैयाँ भएपनि धेरै सेयर लिन चाहने सहकारीका लागि भने बाटो खुला नै रहेको उहाँले बताउनु भयो ।

‘राष्ट्रिय सहकारी बैंक’ सहकारी संघ संस्थाहरुको प्रवद्र्धन, विकास एवम् बैंकिंग कारोवारको लागि सहकारी क्षेत्रको एक मात्र बैंक हो । देशभर झण्डै १२ हजार सहकारी संघ संस्था यसका सदस्य रहेका छन् । बैंकको सेयर पुँजी मात्र २ अर्ब रुपैयाँको हाराहारीमा छ ।