सन्दर्भ ब्याजदर पुनरावलोकन गर्न समितिको बैठक बस्यो, ब्याजदर अझै घट्ने तर नबढ्ने

काठमाडौं, २८ फागुन

सहकारीमा तोकिएको सन्दर्भ ब्याजदर पुनरावलोकन हुने भएको छ । बुधबार ब्याजदर पुनरावलोकन गर्नको लागि सन्दर्भ ब्याजदर निर्धारण समितिको बैठक बसेको छ ।

ब्याजदर तोकिएपछि यो समितिको पहिलो बैठक हो । बैठक बसेसँगै ब्याजदर पुनरावलोकन हुन निश्चित भएको छ । बुधबार बसेको पहिलो बैठकमा तीन वटा विषयमा छलफल भएको थियो ।

साउन १९ गतेदेखि लागू भएको सन्दर्भ ब्याजदरको समिक्षा आजको बैठकले गरेको छ । विगतमा भएको कमी कमजोरी र अब कसरी अघि बढ्ने भन्ने विषयमा सामान्य छलफल भएको हो । समितिमा यसअघि भएको समिति र अहिलेको समितिमा धेरै जना परिवर्तन भएका कारण बुधबार सन्दर्भ ब्याजदरको विषयमा धेरै छलफल हुन पाएन ।

बुधबारको बैठकले यस अघिको समिक्षा गर्ने निर्णय गरेको छ । २० वटै केन्द्रिय संघबाट सुझाव संकलन गरेर प्रतिवेदन बनाउने सहकारी महासंघका वरिष्ठ उपाध्यक्ष ओमदेवी मल्लले बताईन । समितिको बैठकमा यस अघि भएको कमी कमजोरी सुधार गरेर लैजाने विषयमा छलफल भएको उहाँले जानकारी दिनुभयो । शहरमा सञ्चालित सहकारी र ग्रामिण भेगमा सञ्चालित सहकारीमा छुट्टा छुट्टै ब्याजदर लागू गर्नु पर्नेमा उहाँले जोड दिनुभयो ।

समितिको संयोजक सहकारी विभागका रजिष्ट्रार हुने व्यवस्था छ ।

यस अघि १६ प्रतिशत तोकिएको ब्याजदर अब बढ्ने सम्भावना छैन । स्रोतका अनुसार २ देखि ३ प्रतिशत ब्याजदर घटाउने आन्तरिक तयारी सरकारको छ ।