सहकारी मन्त्रालयको सचिवमा केदार न्यौपाने

काठमाडौं, २० फागुन

भूमि व्यवस्था तथा गरिबी निवारण मन्त्रालयका सचिवमा केदार न्यौपाने हुनुभएको छ ।

भूमि व्यवस्था तथा गरिबी निवारण मन्त्रालयका सचिव सूर्य गौतम सरुवा भई संघीय मामिला तथा सामान्य प्रशासन मन्त्रालयको सचिव हुनुभएको छ । न्यौपाने यस अघि काठमाडौं महानगरपालिकाका प्रमुख कार्यकारी अधिकृत हुनुहुन्थ्यो । सहकारी विभागको रजिष्ट्रार समेत भैसक्नुभएका न्यौपाने मन्त्रालयमा आएपछि सहकारी क्षेत्र उत्साहित भएका छन् ।

आइतबार साँझ बसेको मन्त्रिपरिषद् बैठकले न्यौपानेको सरुवा गरेको हो । न्यौपानेका साथै ६ सचिवको सरुवा, नयाँ एक सचिवको पदस्थापन र एक कामु सचिवको पदस्थापन गरेको हो ।

त्यस्तै स्वास्थ्य तथा जनसंख्या मन्त्रालयका सचिव खगराज बराललाई उपराष्ट्रपति कार्यालयमा सरुवा गरेको छ। संघीय मामिला तथा सामान्य प्रशासन मन्त्रालयका सचिव यादव कोइराला स्वास्थ्य तथा जनसंख्या मन्त्रालयमा सरुवा हुनुभएको छ ।

त्यस्तै उद्योग वाणिज्य तथा आपूर्ति मन्त्रालयकी सचिव यमकुमारी खतिवडा महिला बालबालिका तथा ज्येष्ठ नागरिक मन्त्रालयमा सरुवा हुनु भएकी छ । उद्योग बाणिज्य तथा आपूर्ति मन्त्रालयमा महिला बालबालिका तथा ज्येष्ठ नागरिक मन्त्रालयका चन्द्र घिमिरेलाई ल्याइएको छ ।

नयाँ बढुवा भएका सचिव एकनारायण अर्याललाई बैठकले काठमाडौं महानगरपालिकाको प्रमुख कार्यकरी अधिकृतमा पदस्थापन गरेको छ। भने कामु सचिवमा बढुवा भएका सहसचिव रामशरण पुडासैनीलाई अर्थ मन्त्रालयको राजश्व सचिवको जिम्मेवारी दिइएको छ।

सरुवा र पदस्थापन भएका सबै सचिवले मंगलबार पत्र बुझेका छन्।