सहकारी बैंकद्वारा क्षमता अभिवृद्धि तालिम

राष्ट्रिय सहकारी बैंक बागलुङ शाखाको आयोजनामा सहकारी संघ सस्थाका सञ्चालकहरुका लागि आयोजित एक दिने क्षमता अभिवृद्धि तालिम सोमतबार सम्पन्न भएको छ ।

म्याग्दी, १२ फागुन

म्याग्दीमा क्रियाशिल विभिन्न विषयका सहकारीका सञ्चालकहरुलाई विद्यमान ऐन कानुन लगायत सहकारीको व्यवसायिक सफलताका लागि सञ्चालकहरुको काम कर्तव्य अधिकारका विषयमा जानकारी गराउने उदेश्यका साथ तालिमका आयोजना गरिएको बैंकले जनाएको छ ।

तालिममा सहजीकरण गर्दै बैंकका सञ्चालक तथा गण्डकी प्रदेशका संयोजक रामबहादुर जिसीले सहकारी ऐन नियमको पालना गर्दै व्यवसायिक कार्यमा लाग्न सञ्चालकहरुलाई आग्रह गर्नु भयो । व्यवहारिकताका नाममा ऐन नियम विपरित गरिने कार्यले सहकारीहरुलाई समस्यामा पार्ने भन्दै उहाँले सहकारी ऐन नियमको पालना तथा सहकारी क्षेत्रमा आएका प्रविधिहरुको उपयोग गरेर अगाडि बढ्न सुझाव दिनुभयो । सहकारीको पहिलो काम सदस्यहरुको सेवा हो भन्दै उहाँले सहकारीहरुले योजना बनाउदा सदस्यको हितमा हुने कार्यक्रमहरुलाई प्राथमिकता दिनु पर्नेमा जोड दिनुभएको थियो ।

कार्यक्रममा सहभागीहरुको तर्फबाट पश्चिम नेपाल वचत तथा ऋण सहकारी संस्थाका अध्यक्ष सुरेन्द्रराज शर्मा र लोकदिप वचत तथा ऋण सहकारी संस्थाका उपाध्यक्ष प्रमिला जोशीले तालिमले सहकारीलाई अगाडि बढाउन मद्दत गरेको बताउनु भएको थियो ।

तालिमका सहभागीहरुले बेनी बजारमा सहकारी बैंकको शाखा स्थापना गर्न माग गरेका छन् । शाखा नभएका कारण सहकारीको वचत अन्यत्र राख्दा सहकारीलाई समस्या भएको भन्दै म्याग्दीका सहकारीकर्मीहरुले बैंकको शाखा बेनीमा स्थापना गर्न माग गरेका हुन् । कार्यक्रममा शाखाको अवस्थाका बारेमा शाखा कार्यालय बागलुङका प्रमुख युवराज त्रिपाठीले जानकारी गराउनु भएको थियो ।