५ सहकारी संस्था गाभिए

सहकारी अभियान खुम्चाउने खालको ऐन आउने छैन : मन्त्री थानी

काभ्रे । सहकारी तथा गरिवी निवारण मन्त्री हृदयराम थानीले सहकारी अभियानलाई खुम्च्याउने खालको ऐन नआउने दाबी गरेका छन् ।

पनौती ५ वटा सहकारी संस्था मर्जरको घोषणा कार्यक्रममा बोल्दै उनले सहकारी क्षेत्रमा नमिल्दो प्रावधानहरु ऐनबाट हटाइने दाबी गरे । ‘सहकार्रीमैत्री ऐन आउँछ, ऐन कडा बनाउन मलाई आवश्यक छैन,’ उनले भने, ‘सहकारी सिद्धान्त, मुल्य र मान्यता अनुसारकै ऐन आउँछ, अप्ठ्यारा दफाहरु संशोधन गर्न म तयार छु ।’ उनले सहकारी आन्दोलनमा सबैको सहभागिता आवश्यक रहेको भन्दै शिक्षक र कर्मचारीले सहकारीमा सहभागी हुन नपाउने व्यवस्था ऐनबाट हटाउने बताए । उनले साना सहकारीलाई कर बढी भएको गुनासो आएको भन्दै उनले कर घटाउने विषयमा आवश््रयक विधी र प्रकृया थालिने जानकारी दिए । उनले सहकारीले आफै लगानी गर्न पाउने व्यवस्था माग गरिएको भन्दै त्यसो हुन सके रोजगारी सृजना हुने दाबी गरे ।

५ सहकारी संस्था गाभिए
जिल्लाका ५ सहकारी संस्था गाभिएका छन् । पनौती र आसपासका नवदुर्गा, पात्लेखेत, शारदा बचत, शारदा माइ र भुमिडाँडा बचत तथा ऋण सहकारी संस्था गाभिएका हुन् । एकिकृत सहकारीको नाम नवदुर्गा बचत तथा ऋण सहकारी संस्था राखिएको छ । एकिकृत कारोबार शुरु गरेपछि सहकारीको कुल पूँजी १० करोड ६५ लाख ७७ हजार भएको छ ।

३ हजार १ सय ६२ शेयर सदस्य रहेको सहकारी संस्थामा १ करोड ३९ लाख शेयर रकम रहेको तदर्थ समितिका अध्यक्ष यज्ञप्रसाद हुमागाईले जानकारी दिए । सहकारी तथा गरिबी निवारण मन्त्री हृदयराम थानीले एकिकरण भएको घोषणा गरे । उनले सहकारी क्षेत्रलाई खुम्चाउने खालको ऐन नआउने विश्वास व्यक्त गरे । उनले सहकारी मर्जरको क्रम शुरु भएकोमा खुशी व्यक्त गरे ।