नवजीवन सहकारीको अध्यक्षमा गोपालराज पाठक विजयी

कैलाली : नवजीवन सहकारी संस्था लिमिटेडको अध्यक्षमा गोपालराज पाठक विजयी भएका छन् । अध्यक्षका प्रतिस्पर्धी केशवराज मिश्रको प्यानललाई क्लीन स्वीप गर्दै पाठक ३१५ मतान्तरसहित अध्यक्षमा निर्वाचित भएका हुन् ।

निर्वाचन समितिका अनुसार पाठकले ४ हजार ७८४ मत प्राप्त गर्दा उनका निकटतम प्रतिद्वन्द्वी मिश्रले ४ हजार ४६९ मत पाए । अर्का उम्मेदवार घनबहादुर शाहले ३ हजार ६४४ मत प्राप्त गरेका थिए ।

मिश्र प्यानल पूर्ण रूपमा पराजित भएको छ भने शाह प्यानलबाट एक जना सदस्य मात्रै विजयी भएका छन् । अधिकांश पदमा भने पाठक प्यानलकै उम्मेदवार विजयी भएका छन् ।

उपाध्यक्षमा उत्तम जोशी ४ हजार ३०३ मतसहित निर्वाचित भए । उनका प्रतिस्पर्धी ईश्वरप्रसाद जोशीले ३ हजार ९०४ तथा उपेन्द्र विष्टले ३ हजार १९५ मत प्राप्त गरेका छन् ।

लेखा सुपरीवेक्षण समितिको संयोजकमा गणेशप्रसाद जोशी ५ हजार १७२ मतसहित विजयी भए । उनका प्रतिद्वन्द्वी चेतराज जोशीले ५ हजार ३३ मत प्राप्त गरेका थिए । समितिको सदस्यमा खेमराज पाठक (६ हजार ४३) र गणेशप्रसाद पाध्याय (४ हजार ५५९) निर्वाचित भएका छन् ।

कार्य समितिको ७ सदस्य पदमध्ये ४ जना पाठक प्यानलका, २ जना स्वतन्त्र र १ जना शाह प्यानलका उम्मेदवार विजयी भएका छन् । स्वतन्त्र उम्मेदवार केशवराज जोशी सर्वाधिक ५ हजार १४३ मतसहित सदस्यमा निर्वाचित भए ।

यस्तै, सदस्यमा कोपिला कुँवर (४११२), गणेश बम (३४२६), जयराज जोशी (३२८०), लक्ष्मीराज पन्त (३२७६), खेमराज पाण्डेय (३१३२) र दिर्घबहादुर शाह (३११८) विजयी भएका छन् ।

४० हजार ८१४ शेयर सदस्य रहेको सहकारीको शनिबार सम्पन्न निर्वाचनमा १५ हजार २४१ मत खसेको थियो ।