सहकारी सचिव शर्माको सरुवा, मदन भुजेललाई जिम्मेवारी

काठमाडौं : नेपाल सरकारले भूमि व्यवस्था, सहकारी तथा गरिबी निवारण मन्त्रालयका सचिव केदारनाथ शर्माको सरुवा गरेको छ। उहाँको ठाउँमा मधेश प्रदेशका सचिव मदन भुजेललाई स्थानान्तरण गरिएको छ । शर्मालाई भने रक्षा मन्त्रालयमा सरुवा गरिएको छ । साेमबार बसेको मन्त्रिपरिषद् बैठकले शर्मासहित चार सचिवको सरुवा गरेको हो । मन्त्रिपरिषद् बैठकले संघीय तहका प्रमुख निकायका सचिवहरूको अदली–बदली गर्ने निर्णय गरेको थियो।

यसअघि, कोशी प्रदेशका प्रमुख सचिव रहेका शर्मालाई सरकारले २०८२ बैशाखमा सहकारी मन्त्रालयमा सरुवा गरेको थियो । २०८२ बैशाख ८ गते सोमबार बसेको मन्त्रिपरिषद्को बैठकले शर्मालाई सहकारी मन्त्रालयमा सरुवा गरेको थियो ।

यसैगरी, हिजोको मन्त्रिपरिषद् बैठकले संघीय मामिला तथा सामान्य प्रशासन मन्त्रालयका सचिव रविलाल पन्थलाई राष्ट्रिय योजना आयोगमा सरुवा गरेको छ भने कोशी प्रदेशकी प्रमुख सचिव चन्द्रकला पौडेललाई संघीय मामिला तथा सामान्य प्रशासन मन्त्रालयमा पठाएको छ।