सयपत्री साकोसको १९ औं वार्षिक साधारण सभा सम्पन्न, १५ प्रतिशत लाभांश पारित

भक्तपुर : भक्तपुर जिल्ला चाँगुनारायण नगरपालिका ९ स्थित सयपत्री बचत तथा ऋण सहकारी संस्था लिमिटेडको १९ औं वार्षिक साधारण सभा सम्पन्न भएको छ ।

साधारण सभाको उद्घाटन संस्थापक ज्येष्ठ सदस्य बुद्धिबहादुर ङाखुसीले गर्नुभएको थियो । सभामा संस्थाका अध्यक्ष हरिगोपाल बासुकलाले पछिल्लो समय सहकारी अभियानले समस्या र चुनौतीहरु सामना गरिरहेको बताउनुभयो ।

सहकारीको मर्म, भावना र स्वालम्बनबाट विचलित भई सञ्चालित सहकारी संस्थाहरु संकटमा परेको भन्दै उहाँले समुदायमा आधारित भएर सुशासनमा सञ्चालित सहकारी संस्थाहरु समस्यामा नपरे स्पष्ट पानुभयो ।

सदस्यहरुले खाई नखाई सुरक्षित भविष्यको लागि गरेको बचत र सदस्यहरुको विश्वास माथि खेलबाड गर्ने सहकारी संस्थाहरुका कारण सबै सहकारी संस्थाप्रति नै आमनागरिकले हेर्ने दृष्टिकोण नकारात्मक हुनु चिन्ताको विषय रहेको उहाँको भनाइ थियो ।

संस्थाका सचिव सत्यराम थुयाजूले आ.व. २०८१/८२ को प्रगति प्रतिवेदन, कोषाध्यक्ष रामप्रसाद मचामसीले आर्थिक प्रतिवेदन, ऋण उपसमितिका संयोजक नारायणभक्त थुयाजूले ऋण प्रतिवेदन, लेखा सुपरीवेक्षण समितिका संयोजक बाबुकाजी माकजूले लेखा सुपरीवेक्षण समितिको प्रतिवेदन प्रस्तुत गनुभएको थियो । उक्त प्रतिवेदनहरु माथि छलफलसँगै सदस्यहरुबाट उठेका प्रश्नहरुको सम्बन्धित पक्षबाट जवाफ दिइएपछि सभामा प्रस्तुत प्रस्तावहरु सर्वसम्मत रुपमा पारित गरिएको थियो ।

सचिव थुयाजूबाट प्रस्तुत आ.व. २०८१/०८२ को प्रगति प्रतिवेदन, बचत तथा ऋण नीतिमा गरिएको संशोधन, विनियम पुनर्लेखन एवं आ.व. २०८२/०८३ को नीति तथा कार्यक्रम, कोषाध्यक्ष मचामसीबाट प्रस्तुत आ.व. २०८१/०८२ को आर्थिक प्रतिवेदन तथा आ.व. २०८२/०८३ को अनुमानित बजेट, आ.व. २०८१/०८२ को लेखापरीक्षण प्रतिवेदन र आ.व. २०८१/०८२ को लेखा सुपरीवेक्षण समितिको प्रतिवेदन सभाबाट सर्वसम्मत पारित गरिएको थियो ।

यसैगरी, सभाबाट आ.व. ०८२/०८३ को लेखापरीक्षण गर्न आर.टी.श्रेष्ठ एन्ड एसोसिएट्सका रमेश थापा श्रेष्ठलाई लेखापरीक्षक नियुक्ति गर्ने र निजको पारिश्रमिक निर्धारण, आ.व. ०८१/०८२ को खुद नाफालाई विनियमबमोजिम कोष बाँडफाँड गरी व्यवस्था गरिएको शेयर लाभांश कोषबाट सदस्यहरुलाई करसहित १५ प्रतिशतबराबर शेयर लाभांश वितरण गर्ने प्रस्ताव पारित गरिएको थियो ।

त्यसैगरी, संरक्षित पुँजी फिर्ता कोषबाट ऋणमा प्राप्त ब्याजको आधारमा ६० प्रतिशत र बचतमा दिएको ब्याजको आधारमा ४० प्रतिशतका हिसाबले रकम वितरण गर्ने प्रस्ताव पनि सभाबाट सर्वसम्मत पारित भएको थियो ।

कार्यक्रममा संस्थाका संस्थापक अध्यक्ष रामचन्द्र बासी, देवी माध्यमिक विद्यालयका प्रधानाध्यापक चन्द्रबहादुर थुयाजू, संस्थाकी उपाध्यक्ष रामकेशरी बासुकला र व्यवस्थापक सत्यराम त्वातीले मन्तव्य राख्नुभएको थियो ।