सहकारी दिवसको अवसरमा एकीकृत फ्रेण्डसिप साकोसको सुशासन सम्बन्धी तीन कार्यक्रम

दोलखा : जिरी स्थित एकीकृत फ्रेण्डसिप बचत तथा ऋण सहकारी संस्थाले तीन वटा छुट्टा छुट्टै अन्तरक्रिया कार्यक्रम गर्दै ६८औं राष्ट्रिय सहकारी दिवस मनाएको छ । जिरी नगरपालिकासँगको सहकार्यमा ‘सहकारी सुशासनमा सदस्य, सञ्चालक र व्यवस्थापनको भूमिका’ विषयक तीन दिने कार्यक्रम आयोजना गरी सहकारी दिवस मनाएको हो।

सहकारी संस्थाहरुका सञ्चालक, लेखा सुपरिवेक्षण समिति, उपसमिति, कर्मचारी र सदस्यहरुको सहभागितामा ‘मर्यादित सहकारीः समुन्नत समाज’ भन्ने थीमका साथ सहकारी दिवसको अवसर पारेर जिरी नगरपालिकाको आयोजना र एकीकृत फ्रेण्डसिप साकोसको सहजीकरणमा उक्त अन्तरक्रिया कार्यक्रम सञ्चालन गरिएको थियो।

पहिलो कार्यक्रम चैत १८ गते जिरी नगरपालिका वडा नं. ९ स्थित ठूलोपातल मा.वि.को सभाहलमा त्यस वडाभित्र सञ्चालित सहकारीका ३२ जना सहकारीकर्मीको उपस्थिति र जिरी न.पा.सहकारी समन्वय समिति सदस्य कुशबहादुर तामाङको सभापतित्वमा सम्पन्न भएको थियो ।

त्यस्तै दोश्रो कार्यक्रम अन्तर्गत चैत १९ गते जिरी नगरपालिका वडा नं. १ मा सञ्चालित विभिन्न सहकारी संस्थाका ४० जना प्रतिनिधिको सहभागिता, जिरी न.पा. सहकारी समन्वय समितिका उपाध्यक्ष खुसबहादुर कार्कीको सभापतित्व र दोलखा जिल्ला बचत संघका अध्यक्ष भुमिराज खड्काको प्रमुख आतिथ्यतामा दोश्रो दिनको अन्तरक्रिया कार्यक्रम जिरी न.पा. वडा नं. १ को सभाहलमा सम्पन्न गरेको थियो ।

६८औं राष्ट्रिय सहकारी दिवसको मुख्य दिन चैत २० गते एकीकृत फ्रेण्डसिप साकोसको सभाहलमा जिरी नगरपालिका वडा नं. २, ४, ५ र ६ का करिब ४५ जनाको सहभागितामा जिरी नगरपालिका सहकारी समन्वय समिति सदस्य भिमबहादुर जिरेलको सभापतित्व र जिरी नगरपालिकाका प्रमुख प्रशासकीय अधिकृत पुरुषोत्तम सापकोटाको प्रमुख आतिथ्यतामा अन्तिम अन्तरक्रिया कार्यक्रम गर्दै ३ दिने सहकारी दिवस कार्यक्रम सम्पन्न भएको छ ।

३ दिनकै कार्यक्रमको सञ्चालन जिरी नगरपालिका सहकारी विभाग प्रमुख सानुमैया (साविन्द्रा) खड्काले गरेका थिए । कार्यक्रममा स्वागत मन्तव्यसहित एकीकृत फ्रेण्डसिपका नायव प्रमुख कार्यकारी अधिकृत रामबहादुर खत्रीले स्वागत गरेका थिए ।

सुशासनको परिचय, महत्व, औजार र क्षेत्रको जानकारी सहित सुशासन कसरी कार्यान्वयन गर्ने र सुशासन नहुँदाका कानूनी दण्डसजायको व्यवस्था लगायतका विषयहरुमा एकीकृत फ्रेण्डसिप साकोसका प्रमुख कार्यकारी अधिकृत रामकृष्ण रायक्षेत्रीले आफ्नो प्रस्तुतीकरण सहित तीनै दिनको कार्यक्रमको सहजीकरण गरेका थिए । साथै कार्यक्रममा सुशासन पालनामा कुनै सम्झौता नगरिने सहभागीहरुले प्रतिवद्धता समेत व्यक्त गरेका छन । आज साँझ संस्थाले सहकारी दिवसको अवसरमा दिपालवी समेत गरेको छ ।