अम्बे कोशी साकोस समस्याग्रस्त घोषणा

सुनसरी : कोशी प्रदेश सरकारले इटहरीमा केन्द्रीय कार्यालय रहेको अम्बे कोशी बचत तथा ऋण सहकारी संस्थालाई समस्याग्रस्त घोषणा गरेको छ ।

कोशी प्रदेश उद्योग, कृषि तथा सहकारी मन्त्रालयले संस्थालाई मंगलबार समस्याग्रस्त घोषणा गरेको हो । मन्त्रालयका सचिव डा शरणकुमार पाण्डेले अम्बे कोशीलाई समस्याग्रस्त घोषणा गरिएको र समस्यामा रहेका अन्य सहकारीको पनि अध्ययन भइरहेको बताए ।

कोशी प्रदेश सरकारले गत पुस १८ गते वरिष्ठ अधिवक्ता भरतबन्धु थापाको अध्यक्षतामा संकटग्रस्त सहकारीको व्यवस्थापन समिति गठन गरेको थियो । समिति गठन भएको पाँच दिनपछि अम्बे कोशीलाई समस्याग्रस्त घोषणा गरिएको हो ।

संस्थाका अध्यक्ष फणीन्द्र मगर पुर्पक्षका लागि थुनामा छन् । पक्राउ परेका कतिपय सञ्चालकहरू धरौटीमा रिहा भएका छन् ।

सहकारीको रकम अपचलनमा नेकपा एमालेका केन्द्रीय सदस्य समेत रहेकी सहकारी अभियन्ता विष्णु कुमारी लिम्बू (अमृता सुब्बा) पनि संलग्न छिन् । सुब्बाले २१ लाख ५५ हजार अपचलन गरेको मुद्दा अदालतमा छ ।

इटहरीमा केन्द्रीय कार्यालय रहेको संस्थाको विराटनगरको विराट चोक र झापाको दमकमा सेवा केन्द्र सञ्चालन गरेको थियो । संस्थामा १३ हजारभन्दा बढी सदस्यको ६१ करोड बढी बचत अपचलन भएको बताईएको छ ।