सदस्यबाट उत्पादित सामग्रीको प्रदर्शनी तथा बिक्री मेला गर्दै मकवानपुर बचत संघ

हेटौंडा : सहकारीका सदस्यबाट उत्पादित सामग्रीको प्रदर्शनी तथा बिक्री मेला हेटौंडामा हुने भएको छ । मकवानपुर जिल्ला बचत तथा ऋण सहकारी संघ लिमिटेडको २०औं स्थापना दिवसको सन्दर्भमा हेटौंडामा तीन दिवसीय मेला हुन लागेको हो ।

मेला पुस १६ देखि १८ गतेसम्म सञ्चालन हुने छ । मेलाको तयारी पुरा भएको समेत आयोजक संघले जनाएको छ । हेटौंडा-२, स्थित संघको नवनिर्मित भवनमा मेला हुने संघकी अध्यक्ष कल्पना श्रेष्ठले जानकारी दिईन ।

मेलामा साकोस, कृषि तथा बहुउद्देश्यीय सहकारीका उत्पादनका साथै सहकारीका सदस्यहरुले उत्पादन गरेका हस्तकला, खाद्य, मसला, दुग्धजन्य सामग्रीहरू स्टलमा राखिने अध्यक्ष श्रेगठले बताइन् । मेलामा ४० स्टल रहने छ भने करिब १० हजार जनाले अवलोकन गर्ने अनुमान गरिएको छ ।

प्रदर्शनीमा करिब पाँच लाख रुपैयाँ खर्च हुने अनुमान गरिएको छ । सोही सन्दर्भमा सहकारी हाजिरीजवाफ, निबन्ध प्रतियोगिता, वक्तृत्वकला प्रतियोगिताको समेत आयोजना गरिएको छ ।

साथै पौष १८ गते संघको नवनिर्मित भवनको उद्घाटन गर्ने कार्यक्रम रहेको छ । संघले करिब ३ करोड ५० लाख रुपैयाँ खर्चेर ३४ धुर क्षेत्रफलमा २९ सय स्क्वायर फिटको नयाँ भवन हेटौंडामा निर्माण गरेको छ ।

संघको स्थापना दिवसको सन्दर्भ पारेर यस भवनको समेत उद्घाटन गरिने व्यवस्थापक सुमित्राकुमारी वाइवाले बताइन् । भवन निर्माण गर्न प्रदेश सरकारबाट ३३ लाख, जिल्लाका ४ वटा पालिकाबाट अनुदान रकम, सदस्य सहकारीबाट करिब ९ लाखभन्दा बढी र संघको जगेडा कोषबाट बजेटको व्यवस्था गरिएको उनले बताईन ।

‘सहकारीले बचत र ऋण मात्र प्रवाह गर्दैन, रोजगारी पनि सिर्जना गरेको छ भनेर हामीले भनिरहेका थियौं । यसलाई पुष्टि गर्न पनि मेला आयोजना गर्न लागेका हौं,’ अध्यक्ष श्रेष्ठले भनिन्, ‘मेलाबाट पक्कै पनि सहकारीले गर्दै आएको कामले थप बजार पाउने विश्वास हामीले लिएका छौं ।’