‘केही व्यक्ति र प्रवृत्तिका कारण समग्र अभियान कदापि प्रताडित हुनुहुँदैन’

एउटै अभियान एउटै आवाजः सुरक्षित साकोस समुन्नत समाज भन्ने मूल मन्त्रसहित हामीले यो साधारण सभा शान्तिका अग्रदूत गौतमबुद्धको तपोभूमिमा आयोजना गरेका छौं । १६ वर्षपछि काठमाडौं उपत्यकाबाहिर साधारण सभा गर्ने जमर्को गर्दै हामीले यो शान्तिभूमिबाट र हाम्रा सदस्यहरुको सहभागितासाथ सहकारी अभियानभित्र एकता, सहिष्णुता, सद्भाव र सहकार्यको एकताबद्ध सन्देश विश्व सहकारी अभियानसम्म प्रवाह गर्ने उद्देश्यले साधारणसभा आयोजना गरेका हौं । हाम्रो एउटै अभियान र एउटै आवाज भनेको सबै साकोसहरुलाई सुरक्षित र दिगो बनाउँदै समाजलाई समुन्न्त बनाउने नै हो । यो सहकारी अभियाको साझा प्रण पनि हो ।

करिब ७० वर्ष लामो इतिहास बोकेको सहकारी अभियानले अहिले ठूला चुनौतीहरु सामना गरिरहेको छ । सहकारीको मूल्य, मान्यता, सिद्धान्तसँगै राष्ट्रिय अन्तर्राष्ट्रिय अभ्यासहरुलाई आत्मसात गर्दै सदस्य केन्द्रीत सामाजिक उद्यमका रुपमा अघि बढाइनुपर्नेमा सहकारीका नाममा केही छद्मभेषीहरुका गैरसहकारी क्रियाकलापन, व्यक्तिगत प्रलोभन, सैद्धान्तिक र नीतिगत स्खलनका कारण समुदायमा आधारित सदस्य केन्द्रीत सहकारीहरु पनि प्रभावित र प्रताडित भएका छन् । यौ साझा चिन्ताको विषय हो ।

स्वायत्तता र स्वतन्त्राको सैद्धान्तिक जगमा उभिनुपर्नेमा केही सहकारीहरुमा आन्तरिक सुशासन र नियन्त्रण प्रणाली कमजोर देखिएका कारण समग्र सहकारी अभियानमा यसको बाछिटा परेको छ । खाइनखाइ सुरक्षित भविष्यको लागि सदस्यहरुले गरेको बचत र उनीहरुको विश्वासमाथि खेलवाड गर्ने काम भएको छ । यो अक्षम्य अपराध हो । नेफ्स्कून यस किसिमको कार्यको भत्र्सना गर्दै गलत गर्नेहरुलाई कारवाही र सही काम गर्नेलाई सकारात्मक पृष्ठपोषणको सबैबाट अपेक्षा गर्दछ । त्यसैकारण पनि हामीले यो सभाबाट एउटै आवाज एउटै अभियानको सन्देश प्रवाह गर्नुपर्ने गुरुत्तर दायित्व छ ।

मुलुकका लागि सहकारी अभियानको अपरिहार्यता र अभियानले खेलेको भूमिका कोहीकसैबाट छिपेको छैन र मैले आज यहाँ यसको चर्चा गरिरहनुपर्छ भन्ने लाग्दैन । त्यसैले, केही व्यक्ति र प्रवृत्तिका कारण समग्र सहकारी अभियान कदापि प्रताडित हुनुहुँदैन ।

राज्यका कानूनहरुलाई सहकारीका सदस्यमैत्री बनाउँदै उनीहरुको वृहत्तर हितका खातिर काम गर्ने अनुकूलन वातावरण निर्माणका लागि सरकार र सरोकारवालाहरुसँगको बहसपैरवीलाई भोलिका दिनमा थप सघन बनाउने प्रतिबद्धता सञ्चालक समितिको तर्फबाट यहाँ व्यक्त गर्न चाहन्छु । सरकार र सहकारी अभियानको साझा चासो र चिन्तन भनेको यसमा प्रत्यक्ष आवद्ध ७३ लाख बढी सदस्यहरुको सामाजिक, आर्थिक लगायत बहुआयामिक विकास नै हो ।

यसतर्फ सहकारी अभियान र यसमा आवद्ध हामी सबैले गम्भीर भएर सोच्नुपर्दछ र सोही अनुरुप रणनीति र कार्यक्रहरु तय गरिनुपर्दछ भन्ने लाग्दछ । आजको यो भव्य उपस्थितिले सहकारी अभियानमाथिको आस्था, अपेक्षा र विश्वास पुनस्र्थापित गरेको महशूस गरेका छौं । सहकारी अभियानमाथिको सदस्यहरुको विश्वास पुनजागृत गरेको विश्वास गरेका छौं ।

नेफ्स्कून नेपालको सहकारी अभियानको सबैभन्दा बलियो परिचायक हो भन्दा अत्युक्ति नहोला । सहकारी अभियानलाई सदस्यहरुको समृद्धिको अभियान बनाउने हाम्रो मुख्य उद्देश्य हो । सहकारी अभियानका अन्तर्राष्ट्रिय मूल्य, मान्यता र सिद्धान्तसँगै बचत तथा ऋण सहकारी सञ्चालनका विशिष्ट सैद्धान्तिक धरातलमा उभिएर सदस्य संघ संस्थाहरुमार्फत व्यक्तिगत सदस्यहरुको जीवन रुपान्तरण हाम्रो ध्येय हो ।
यो साधारणसभा हाम्रा सदस्य संघ संस्थाहरुको सभा हो । सदस्यहरुको सर्वोच्चतालाई आधिकारिता, वैधता र प्रामाणिकता दिने मुख्य सभा हो । हाम्रा प्रमुख अतिथि, बिशिष्ट अतिथि एवम् अतिथिहरुको हौसला, सदस्यहरुको मार्गदर्शन, अग्रजहरुको सल्लाह सुझाव र सञ्चारमाध्यमको खबरदारीपूर्ण समर्थनले हामी आगामी दिनमा थप सशक्त बन्दै सहकारीमार्फत समाजवादको संविधानको परिकल्पनालाई साकार पार्न दत्तचित्त भई लाग्ने विश्वास यहाँहरुलाई दिलाउन चाहन्छौं ।

हामी केवल सदस्यहरुका प्रतिनिधि हौं । नेफ्स्कूनको ३२औं वार्षिक साधारणसभाबाट सदस्यहरुले विश्वास गरेर सुम्पेको जिम्मेवारीलाई हामीले इमानदारी र निष्ठापूर्वक निर्वाह गरेका छौं । हामीले संघको ओजस्वी लिगेसीलाई कायम राख्न कर्तव्यनिष्ठ भई काम गरेका छौं भन्ने विश्वास छ । अन्तिम मूल्यांकनकर्ता त तपाईहरु सदस्यहरु नै हुनुहुन्छ ।

अबको १० दिनपछि अंग्रेजी नयाँ वर्ष २०२५ सुरु हुँदैछ । सन् २०२५ लाई संयुक्त राष्ट्र संघीय अन्तर्राष्ट्रिय सहकारी वर्षका रुपमा मनाउने तयारी विश्व सहकारी अभियानले गरेको छ जसको औपचारिक घोषणा अन्तर्राष्ट्रिय सहकारी महासंघले हालै भारतको राजधानी नयाँ दिल्लीमा आयोजना गरेको ग्लोबल कोअपरेटिभ कन्फ्रेन्शको क्रममा गरिएको थियो । विश्व सहकारी अभियानसँगै एकाकार हुँदै सहकारीमार्फत पिधँमा परेका र पिछडिएका वर्ग र समुदायहरुको सर्वाङ्गीण विकास सम्भव छ भन्ने सन्देश प्रवाह गर्ने उक्त अवसरलाई नेपालको सहकारी अभियानले पनि भरपूर प्रयोग गर्ने वातावरण निर्माणमा यो सभा सहयोगी हुने विश्वास पनि लिएका छौं । यस्तै, आन्तरिक पर्यटन प्रवर्धनमा सहकारी क्षेत्रले उल्लेख्य भूमिका निर्वाह गर्न सक्छ भन्ने सन्देश पनि यो सभाले प्रवाह गर्ने हामीलाई विश्वास छ ।

यो सर्वोच्च सभाको उद्देश्य, गरिमा र महत्तालाई कुनै कमी हुन नदिई यी विषयहरुमा पनि यो सभा अविष्मरणीय बन्नेछ भन्ने हामीलाई लागेको छ । सहकारीका सबै सदस्यहरु सहभागी भई संस्थाका हरेक महत्वपूर्ण विषयहरुमा विमर्श गर्ने, दूरदर्शी अनि दूरगामी निर्णयहरु गर्ने र संस्थालाई सदस्यहरुको जीवनपद्धतिको महत्वपूर्ण पाटो बनाउन सधै झैं नेफ्स्कूनको यो साधारण सभा पनि सफल हुने विश्वास हामीले लिएका छौं । मुलुकको बचत तथा ऋण सहकारी अभियानलाई थप मर्यादित, सुशासित, पारदर्शी बनाउने काममा यहाँहरुको साथ, सहयोग र सद्भावपूर्ण सहकार्यको अपेक्षा हामी गर्दछौं । अभियानमाथि अनावश्यक प्रहार पनि भैरहेको अवस्थामा मुलुकभरका सदस्यहरुलाई सकारात्मक सन्देश प्रवाह गर्ने गरी हामी साझा संकल्प प्रस्तावहरु जारी गर्न सफल हुनेछौं भन्ने विश्वास हामीले लिएका छौं ।

निर्वाचनबाहेकको साधारणसभा प्रायः एक दिन गर्ने गरिएपनि यो वर्ष हामीले सहकारी अभियानलाई नै असर पार्ने र यसमार्फत खासगरी पिछडिएका वर्ग र समुदायको जीवनस्तर परिवर्तनमा भएका कामहरु, समाज रुपान्तरणका उदाहरणीय कार्यलाई नै छायाँमा पार्ने गरी भएका गतिविधिहरु विरुद्ध बुटवलबाट एकता, परिवर्तन, सुशासन, पारदर्शीता र इमानदारीको बिगुल फुक्ने गरी सबैको जमघटको अवसरलाई सदुपयोग गरी पहिलो दिन प्रमुख अतिथि, बिशिष्ट अतिथि तथा अतिथिहरुबाट मार्गदर्शन प्राप्त गर्ने, स्वअनुसाशनका सम्बन्धमा आवश्यक सिकाइहरुबाट आत्मप्रेरित गर्ने र र दोस्रो दिन सदस्यहरुको निर्णायक भूमिकाको उच्च कदर गर्दै हाम्रो गतिविधिहरुको अनुमोदन गर्दै आगामी मार्गचित्र स्पष्ट पार्ने उद्देश्यले दुई दिन कार्यक्रम राखेको यो सभासमक्ष अवगत गराउन चाहन्छु ।

अन्त्यमा, १६ वर्षपछि नेफ्स्कूनको वार्षिक साधारणसभा काठमाडौं उपत्यका बाहिर आयोजना गरेका छौं । नेफ्स्कून सञ्चालक समितिले मेरै संयोजकत्वमा ७ सदस्यीय ३३औं वार्षिक साधारणसभा तयारी व्यवस्थापन उपसमिति गठन गरेको थियो । म यो अवसर प्रदान गर्ने सञ्चालक समितिलाई पनि हार्दिक धन्यवाद दिन चाहन्छु । व्यवस्थापन उपसमितिमा रही अहोरात्र खटेर आज यो साधारण सभा सफल बनाउन सहयोग गर्नुहुने सञ्चालक समितिका साथीहरु तथा सबै आदरणीय व्यक्तित्वहरुलाई जति धन्यवाद दिएपनि कमै हुन्छ । त्यसैगरी, स्र्माट व्यवस्थापनका लागि संघको व्यवस्थापनलाई पनि म धन्यवाद दिन चाहन्छु ।

सरकार र सहकारी अभियानको साझा प्रयासबाट मात्र यस क्षेत्रको विकास सम्भव छ भन्ने कुरा पुनः जोड दिँदै बिदा हुन्छु । धन्यवाद ।

(३३औं वार्षिक साधारणको उद्घाटन सत्रमा वरिष्ठ उपाध्यक्ष अधिकारीले राखेका मन्तव्य)