धादिङ बचत संघका अध्यक्ष शर्माले दिए राजिनामा

काठमाडौं : धादिङ बचत तथा ऋण सहकारी संघ लि.का अध्यक्ष नवराज शर्माले राजिनामा दिएका छन् । बागमती प्रदेश बचत तथा ऋण सहकारी संघ (बागमती प्रोस्कून) को कार्तिक २३ गते सम्पन्न साधारण सभा तथा अधिवेशनबाट शर्मा सञ्चालकमा निर्वाचित भएका थिए ।

सहकारी ऐन २०७४ को दफा ४१ (५) बमोजिम कुनै एक व्यक्ति एकै समयमा एक मात्र सहकारी संस्थाको सञ्चालक हुन सक्ने व्यवस्था छ । ऐन कार्यान्वयन गर्दै शर्माले बचत संघको अध्यक्षबाट राजिनामा दिएका हुन् ।

धादिङ बचत संघको १८ औं साधारण सभाबाट शर्मा अध्यक्षमा निर्वाचित भएका थिए । उनको कार्यकाल सकिन एक वर्ष बाँकी थियो । शर्माले मंसिर १० गतेबाट लागू हुनेगरी राजिनामा दिएका हुन् । शर्माको राजिनामा सँगै संघको कार्यवहाक अध्यक्षको जिम्मेवारी वरिष्ठ उपाध्यक्षमा सम्हालेका छन् ।

राजिनामा दिँदै शर्माले सामाजिक सञ्जालमा लेखेका छन्, ‘ मलाई संघको अध्यक्ष पदमा निर्वाचित गरे पश्चात् जिल्लाको बचत तथा ऋण सहकारी अभियानको सुदृढिकरण लागि संघमार्फत अभियानको सेवा गर्ने अवसर प्राप्त भयो । निर्वाचित भए पश्चात् आफ्नो बुद्धि र विवेकले भ्याएसम्म निष्पक्ष र व्यक्तिगत स्वार्थ रहित ढंगबाट संघमार्फत सदस्य संस्थाहरुको सेवा गर्ने प्रयत्न गरे जसको परिणाम र सहकर्मीहरुको साथ र प्रयत्नले धादिङ बचत संघले सदस्य संस्थाहरुको विश्वास आर्जन गरेको र शेयर पूँजीमा गत दुई आर्थिक वर्ष क्रमशः १८ प्रतिशत र १६ प्रतिशत लाभांस वितरण गर्न समेत सफल भएको छ’, थप लेखेका छन्, ‘जुनसुकै भूमिकामा रहे पनि जिल्लाको बचत ऋण सहकारी अभियानमार्फत समुदायको आर्थिक सामाजिक र साँस्कृतिक रुपान्तरणमा सक्रिय रहने प्रतिबद्धता व्यक्त गर्दछु । धादिङ बचत संघबाट प्रदान गरिने सबै तालिम तथा क्षमता विकास कार्यक्रमहरुलाई क्रमशः निःशुल्क गर्दै जाने अभियानलाई विद्यमान तथा आउने सञ्चालक समितिले समेत निरन्तरता दिनेछ भन्ने अपेक्षा समेत व्यक्त गर्दछु ।’