दर्शन सहकारी समस्याग्रस्त घोषणा, कार्यालय शीलबन्दी गर्न निर्देशन

काठमाडौं : बागमती प्रदेश सरकारले दर्शन बचत तथा ऋण सहकारी संस्था लिमिटेडलाई समस्याग्रस्त सहकारी घोषणा गरेको छ ।

काठमाडौंको कीर्तिपुर नगरपालिका स्थित दर्शन सहकारीलाई संस्कृति, पर्यटन तथा सहकारी मन्त्रालयको मन्त्री स्तरिय निर्णयबाट आईतबार समस्याग्रस्त सहकारी घोषणा गरेको हो ।

मन्त्रालयले प्रदेश सहकारी ऐन, २०७६ को दफा ८१ को उपदफा २ बमोजिम समस्याग्रस्त सहकारी घोषणा गरेको हो ।

यो सँगै मन्त्रालयले समस्याग्रस्त घोषणा गरेको सहकारीको संख्या २ पुगेको छ । यस अघि २०८० भदौ २१ गते सिभिल सेभिङ्ग एण्ड क्रेडिट को-अपरेटिभ लि. काठमाडौंलाई समस्याग्रस्त गरेको थियो ।

दर्शन सहकारीलाई समस्याग्रस्त घोषणा गरेसँगै प्रदेश सरकार मातहतको समस्याग्रस्त सहकारी व्यवस्थापन समितिलाई कार्यालय शीलबन्दी गर्न निर्देशन दिइसकेको छ।

९ हजार ८ सय ५७ शेयर सदस्य रहेको दर्शन सहकारीले ५२ करोड ८२ लाख रुपैयाँ बचत रकम भुक्तानी फिर्ता दिन बाँकी छ ।