बागमती प्रोस्कून निर्वाचन: कार्तिक १४ सम्म प्रतिनिधि पठाउनु पर्ने, उम्मेदवारी दर्ता २२ गते

काठमाडौं : बागमती प्रदेश बचत तथा ऋण सहकारी संघ लिमिटेड (बागमती प्रोस्कून) को चौथो वार्षिक साधारण सभा कार्तिक २३ गते हुँदैछ । उक्त साधारण सभाले आगामी चार वर्षको लागि नयाँ नेतृत्व समेत चयन गर्नेछ ।

चुनावी साधारण सभा भएसँगै यतिबेला बागमती प्रोस्कूनमा चुनावी रौकन सुरु भैसकेको छ । यतिबेला संघ सदस्यता नविकरण र साधारण सभाको तयारीमा व्यस्त छ ।

साधारण सभामा सहभागिता जनाउन सदस्यता नविकरण अनिवार्य छ । सदस्यता नविकरणको समय सीमा कार्तिक १० गते अन्तिम रहेको छ । यसका साथै ढिलोमा कार्तिक १४ गतेसम्म प्रतिनिधि चयन गरी पठाई सक्नुपर्ने बागमती प्रोस्कूनले जनाएको छ ।

साथै प्रोस्कूनले निर्वाचनका लागि निर्वाचन समिति गठन गरी कार्यतालिका समेत प्रकाशन भैसकेको छ । उक्त कार्यतालिका अनुसार मतदाता नामावली प्रकाशन, छुट नाम दर्ता, नाम संशोधन वा हटाउने र मतदाताको अन्तिम नामावली प्रकाशन कार्तिक २१ रहेको छ ।

त्यस्तै उम्मेदवारी दर्ता, उम्मेदवारको नामावली प्रकाशन, उम्मेदवार उपर दावी विरोध, दावी विरोध उपर छानविन र निर्णय, उम्मेदवारी फिर्ता कार्तिक २२ गते रहेको छ ।

त्यस्तै उम्मेदवारको अन्तिम नामावली प्रकाशन, मतदान लगायतका सम्पूर्ण काम कार्तिक २३ गतेका लागि तोकिएको छ ।

संघको चौथो वार्षिक साधारण सभा काठमाडौंको भिमसेनगोला स्थित आनन्द इभेन्ट्स म्यानेजमेन्ट एण्ड मिटिङमा बिहान ८ बजेदेखि सुरु हुनेछ।

निर्धारित समयमा नविकरण नगर्ने र प्रतिनिधि चयन गरी नपठाउने संस्थाले साधारण सभा र निर्वाचनमा भाग लिन नपाउने संघका अध्यक्ष उद्धव सापकोटाले जानकारी दिए।