नेचुरल सहकारीका सदस्यलाई स्तुपा सामुदायिक अस्पतालमा विशेष छुट

काठमाडौं : नेचुरल बचत तथा ऋण सहकारी संस्थाका सदस्यहरुले स्तुपा सामुदायिक अस्पताल, चुच्चेपाटीमा विशेष छुट पाउने भएका छन् । स्तुपा हेल्थ केयर सेन्टर सहकारी संस्थाद्वारा सञ्चालित स्तुपा सामुदायिक अस्पतालमा अब नेचुरलका सदस्यहरुले १५ देखि २५ प्रतिशतसम्म छुट पाउने छन् ।

आज (बुधबार) एक कार्यक्रमको बीच अस्पतालले प्रदान गर्ने सेवाहरुमा छुट सम्बन्धी सम्झौता भएको छ । अस्पतालको तर्फबाट निर्देशक डा. पेम्बा लामा र नेचुरल सहकारीको तर्फबाट सचिव विकल्प पाठकले उक्त सम्झौता पत्रमा हस्ताक्षर गरेका छन् ।

सम्झौतासँगै अब नेचुरलका सदस्यहरुले ओपिडि सेवामा २५ प्रतिशत, विभिन्न चेक जाँचमा २५ प्रतिशत, सर्जरीमा १५ प्रतिशत र बेड चार्जमा २५ प्रतिशत छुट पाउने छन् । सम्झौता अनुसार सदस्य, कर्मचारी र कर्मचारीको परिवारले छुट सुविधा पाउनेछन् ।

संस्थाले यस अघि पिपुल्स लाईफ केयर अस्पताल, शंखरापुर साँखु लगायत विभिन्न अस्पतालहरुसँग पनि सम्झौता गरी सदस्यलाई छुट सेवा उपलब्ध गराउँदै आएको छ ।