अबको ४ वर्षमा नेफ्स्कून कहाँ?

काठमाडौं : नेपाल बचत तथा ऋण केन्द्रीय सहकारी संघ (नेफ्स्कून)ले हालै छैठौं रणनीतिक व्यवसायिक योजना निर्माण गरी व्यवस्थापनलाई हस्तान्तरण गरेको छ । संघको नयाँ रणनीतिक व्यवसायिक योजना (२०८१/८२–२०८४/८५) साउन २ गते एक कार्यक्रमको बीच नेफ्स्कूनका अध्यक्ष चन्द्रप्रसाल ढकालले प्रमुख कार्यकारी अधिकृत शिवजी सापकोटा (पीएचडी)लाई कार्यान्वयनका लागि हस्तान्तरण गरेका थिए ।

पाँचौ योजना कार्यान्वयन अवधि सकिएसँगै नेफ्स्कून बोर्डले छैठौं योजना तयार गरेको थियो । छैठौं योजनाको थिम ‘स्वस्थ र सुरक्षित साकोसहरुको जवाफदेही एकीकृत सञ्जाल’ रहेको छ ।

अबको ४ वर्षमा सदस्य ५ हजार, व्यक्तिगत सदस्य ५० लाख, सदस्य एकीकरण ३ सय, तालिम शिक्षामा सहभागी ६० हजार, कुल सम्पत्ति ४४ अर्ब, स्थिरीकरण कोषमा सहभागि थप ३ सय हुनेछ । त्यस्तै सञ्जालिकृत साकोस १ सय वटा, प्रदेश स्तरीय कार्यालय ७, स्तरीकरण कार्यक्रम २० प्रतिशत सदस्य आवद्ध, तालिममार्फत जनशक्ति प्रमाणीकरण २ हजार र साझा प्रविधिको उपयोग ५० प्रतिशत सदस्य हुने लक्ष्य लिईएको छ ।

सञ्चालक समिति र उच्च व्यवस्थापनले पाँचौ रणनीतिक योजनाको गहिरो र फराकिलो समीक्षासहित समय, परिस्थिति र साकोस अभियानको अपेक्षा सम्बोधन गर्ने गरी नयाँ रणनीतिक योजना निर्माण गरेको नेफ्स्कूनले जनाएको छ । संघका अध्यक्ष ढकालले नयाँ रणनीतिक योजना कार्यान्वयनमा आएको र कुनै अलमलविना यसलाई परिणाममुखी बनाउन व्यवस्थापनलाई निर्देशन दिएको बताए ।

‘अब प्रविधि हाम्रो प्रायोरिटी हो । प्रविधिकरणको दिशामा भए गरेका कामलाई थप पोलिसिङ गर्दै अघि बढ्नुपर्छ । अर्को भनेको वित्तीय सहकारी ऐनको विषय मुलुकको साकोस अभियानको अर्को अनिवार्य आवश्यकता हो । नेफ्स्कूनको छैठौं रणनीतिक योजनामा समेटिएका यी विषयसँगै अन्य वित्तीय लक्ष्यहरु कार्यान्वयनमा सबैको एकताबद्ध र सार्थक प्रयास रहनेमा सिङ्गो सञ्चालक समिति विश्वस्त छ’, उनले भने । सबैले एउटै स्पिड र स्पिरिटमा काम गर्दा जस्तै कठिनाइ आएपनि लक्ष्य हासिल गर्न सकिने अध्यक्ष ढकालले बताए ।

२०४५ बाट सुरु भएको नेफ्स्कून नेतृत्वको नेपालको साकोस अभियान जागरण, प्रवर्धन, विकास, व्यावसायिकीकरण, गुणस्तर सुनिश्चितत हुँदै सञ्जाल व्यवस्थापनमा पुगेको नेफ्स्कूनका प्रमुख कार्यकारी अधिकृत सापकोटाले बताए । सन् २०१३ मा नेपालमा सम्पन्न ओकू फोरममा क्यानेडियन बचत ऋण सहकारी अभियन्ताले एकीकृत साकोस सञ्जालका विषयमा प्रस्तुतिकरण गरेको स्मरण गराउँदै त्यसयता यो विषयलाई नेपालको साकोस अभियानले प्राथमिकतामा राखेको बताए ।

‘यो रणनीतिक योजना महत्वाकांक्षी भन्दा व्यावहारिक र वस्तुगत छ । समग्र साकोस अभियानको वित्तीय स्वास्थ्यलाई विशेष ध्यानमा राखेर निर्माण गरिएको छ । सदस्य संघ संस्थाहरुको वृद्धि र विकास, नीतिगत एकरुपता र प्रविधिलाई प्राथमिकतामा राखी एकीकृत साकोस सञ्जाल गरी ३ वटा विषयलाई रणनीतिक योजनाले प्रधानमा राखेको छ’, सापकोटाले भने ।

सदस्य संघ संस्थाहरुको नियमित जोखिम सुपरिवेक्षणसँगै अनुगमनको संयन्त्रका रुपमा स्थिरीकरण कोषलाई विकास गर्दै अघि बढ्ने बताए । रणनीतिक योजनाका लक्ष्यहरु हासिल गरी साकोस अभियानलाई थप समृद्ध बनाउने दिशामा नेफ्स्कूुन व्यवस्थापन प्रतिबद्ध भएर लाग्ने उनको भनाई छ ।