विश्वसनीय एवम् उत्कृष्ट वित्तीय सेवा प्रदान गर्दै जाने राष्ट्रिय सहकारी बैंकको प्रतिबद्धता

काठमाडौं : सहकारीको प्रवर्द्धन, विकास तथा बैँकिङ्गको लागि सहकारी क्षेत्रको एक मात्र बैँक ‘राष्ट्रिय सहकारी बैंक लिमिटेड’ स्थापनाको २२औं वर्ष प्रवेश गरेको छ ।

राष्ट्रिय सहकारी बैंक २०६० असार २५ गते दर्ता भएको थियो । तर, बैंकले आफ्ना सदस्य सहकारी संघ/संस्थाहरू बीच २०६१ साउन १९ गतेदेखि कारोबार सुरु गरेको थियो । त्यस्तै २०६७ साउन १० गते नेपाल राष्ट्र बैंकबाट सीमित बैंकिङ्ग कारोबार गर्न स्वीकृति प्राप्त भएको थियो ।

बैंकले साउन १९ गते कारोबार शुभारम्भ भएको दिनलाई स्थापना तथा कारोबार शुभारम्भ दिवसका रुपमा मनाउँदै आएको छ ।

२२ वर्ष प्रवेशको अवसरमा बैंकले परिकल्पनाकार, संस्थापक, पूर्व सञ्चालक समिति तथा लेखा सुपरिवेक्षण समिति, सल्लाहकार, शेयर सदस्य सहकारी संघ/संस्थाहरु, नियामकिय निकाय, राष्ट्रिय तथा अन्तर्राष्ट्रिय साझेदार संघ/संस्थाहरु, कर्मचारीहरू, शुभेच्छुक तथा सरोकारवाला निकायहरू प्रति आभार प्रकट गरेको छ । आगामी दिनमा अझ बढी प्रभावकारी, आधुनिक प्रविधिमैत्री, विश्वसनीय एवम् उत्कृष्ट वित्तीय सेवा प्रदान गर्दै जाने प्रतिबद्धता समेत बैंकले व्यक्त गरेको छ ।

२०८१ जेठ मसान्तसम्ममा बैंकको सेयर पुँजी २ अर्ब ८० करोड, जगेडा कोष १ अर्ब ४७ करोड, कुल बचत ५६ अर्ब ३१ करोड, लगानी २६ अर्ब ६० करोड, तरलता २५ अर्ब ६० करोड, कुल संस्थागत पुँजी १ अर्ब ४७ करोड, विभिन्न कोषहरुमा १७ करोड र कुल सम्पत्ती ६४ अर्ब ७१ करोड रहेको छ । १६ हजार ३ सय ११ सदस्य रहेको बैंकको ऋणी सदस्य १ हजा ५ सय ४३ रहेको छ ।