राष्ट्रिय सहकारी महासंघद्वारा नीति तथा कार्यक्रमको स्वागत, पर्याप्त बजेट विनियोजन गर्न माग

काठमाडौं : नेपालको सहकारी अभियानको शीर्षस्थ निकाय राष्ट्रिय सहकारी महासंघले सरकारले ल्याएको नीति तथा कार्यक्रमको स्वागत गरेको छ ।

संघीय संसदको मंगलबारको संयुक्त बैठकमा सम्माननीय राष्ट्रपति रामचन्द्र पौडेलज्यूले प्रस्तुत गरेको नीति तथा कार्यक्रममा सहकारी अभियानले उठाएका विषयलाई प्राथमिकतामा राखेकोमा महासंघले नेपाल सरकारप्रति आभार समेत प्रकट गरेको छ ।

महासंघले आज प्रेस विज्ञप्ति जारी गर्दै लामो समयको प्रतिक्षापछि सहकारी क्षेत्रले उठाएका चासोलाई सरकारले ल्याएका नीति तथा कार्यक्रममा गम्भीरतापूर्वक सम्बोधन भएकोमा खुशी व्यक्त गरेको छ ।

महासंघकी अध्यक्ष ओमदेवी मल्लद्वारा जारी विज्ञप्तिमा भनिएको छ, ‘आगामी आर्थिक वर्षमा पछिल्लो समयमा देखा परेका चुनौतीहरू सामना गर्न सहकारीको सुपरिवेक्षण र नियमनका लागि विशिष्टकृत निकायको स्थापना गर्ने नीतिले नेपालको सहकारी अभियानलाई दिगो, मर्यादित र सहकारी अभियानको सुशासनलाई सुदृढ पार्ने अपेक्षा राखेका छौं । साथै, सरकारले सहकारी क्षेत्रका लागि यस वर्षको थीम सहकारीमा सुशासनः प्रविधि र एकीकरण लाई सराहनीय रूपमा सम्बोधन गरेको छ । सहकारीको बचत तथा कर्जा सुरक्षण कोष, सहकारी कर्जा असुली न्यायाधिकरण र सहकारी कर्जा सूचना केन्द्र जस्ता प्रमुख संयन्त्रहरूको स्थापना गर्ने तथा बचत तथा ऋणका सहकारीको एकीकरणलाई प्रोत्साहन गर्ने नीतिहरूले सहकारी क्षेत्रको वित्तीय स्थायित्व र लचिलोपनलाई सुदृढ पार्ने सरकारको प्रतिबद्धतालाई महासंघ हार्दिक स्वागत गर्दछ ।’

साथै, सहकारी नीतिलाई समसामयिक आवश्यकताअनुसार परिमार्जन गर्ने सरकारको प्रतिबद्धता यसको उत्तरदायित्व र दूरदर्शिताको प्रमाण हो भन्ने अभियानको बुझाई रहेको समेत विज्ञप्तिमा जानकाएको छ ।

महासंघले सहकारी अभियानकोतर्फबाट नीति तथा कार्यक्रमको प्रभावकारी कार्यान्वयनका लागि पर्याप्त बजेट विनियोजन गर्न सरकारसँग अपिल समेत गरेको छ।