चार गाउँलाई ‘वातावरणमैत्री स्वावलम्बन नमुना गाउँ’ बताउँदै सिवाईसी

बागलुङ : चारतारे युवा क्लब सिवाईसी नेपाल र सिवाईसी बचत तथा ऋण सहकारी संस्था लि. बागलुङको संयुक्त आयोजनामा सोमबार बागलुङ नगरपालीका वडा नं. ६ लम्गाउँमा कार्यक्रम सञ्चालन पूर्वको आधारभूत सर्वेक्षण कार्य सम्पन्न भएको छ ।

समुदायको आवश्यकता पहिचान, वातावरणमैत्री विकल्पहरुको अबस्था र सम्भावना, स्थानिय श्रोतको उपलब्धता, परिचालन र समुदायको धारणा, स्थानिय वस्तुको बजार सुनिश्चित्ता र दिगो उत्पादन र बजार प्रणाली, स्थानिय तहमै वातावरणमैत्री अभ्यासहरुको अवस्था, नविकरणीय ऊर्जा प्रविधिको प्रयोगको अभ्यास, वातावरणमैत्री स्वावलम्वन नमुना गाउँ विकासको लागि आवश्यक पुर्वाधारको अवस्था र हाल भई रहेका सफल अभ्यास साथै विगतमा भएका अन्य अभ्यासहरु लगाएतको बारेमा जानकारी लिने उद्देश्यले यो सर्वेक्षण गरिएको हो ।

आधारभुत सर्वेक्षण कार्यक्रममा वस्तुगत अवस्थाको अध्ययन अवलोकन, वातावरणमैत्री गाउँ विकास अवधारणा बारे जानकारी, समुह लक्षित छलफल र मुख्य सुचना दाता छलफल जस्ता क्रियाकलपाहरु ग्रामिण प्रविधि केन्द्रका अधिकृत सानुवावु पण्डितले गरेका थिए । कार्यक्रममा बागलुङ न.पा. वडा नं. ६ का वडा अध्यक्ष रुद्रवहादुर के.सी.ले लम्गाउँ बागलुङ बजारबाट ३ कि.मी. भित्र पर्ने भएकाले यहाँको समुदाय उत्पादनसंग जोडिनु पर्ने बताए । पछिल्लो समयमा वातावरण देखिएको प्रभावलाई कम गर्न नमुना गाउँ विकासको अवधारण निकै उपयुक्त रहेको बताउँदै वडा अध्यक्ष के.सी.ले लम्गाउँलाई नमुना गाउँ बनाउनका लागि वडा, नगरपालीका, प्रदेश र संघबाट गर्नुपर्ने सबै काम आफुले गर्ने प्रतिवद्धता व्यक्त गरे ।

चारतारे युवा क्लव, सिवाईसी नेपाल र सिवाईसी बचत तथा ऋण सहकारी संस्था लि. बागलुङले आफ्नो वार्षिक प्रस्तावित नीति तथा कार्यक्रम अनुसार यस वर्ष जिल्लाका १० गाउँलाई नमुना गाउँ निर्माणका लागि आधारभुत सर्वेक्षण गर्ने र उपयुक्त ४ गाउँ छनोट गरी वातावरणमैत्री स्वावलम्वन नमुना गाउँको रुपमा विकास गर्ने योजना रहेको छ ।

कार्यक्रम सिवाईसी बचत तथा ऋण सहकारी संस्था लि. तिरुपती सेवाकेन्द्रका सदस्य टेकवहादुर थापाको अध्यक्षता सिवाईसी साकोसका सहायक अधिकृत सचिता खत्रीको स्वागत र सिवाईसी नेपालका कार्यक्रम अधिकृत सुमन घर्ति क्षेत्रीको सञ्चालनमा सम्पन्न भएको थियो ।