विश्वका ३ सय ठूला सहकारीको सूची सार्वजनिक (प्रतिवेदन सहित)

काठमाडौं : अन्तर्राष्ट्रिय सहकारी महासंघ (आईसीए)ले विश्वका ३ सय ठूला सहकारीहरुको सूची सार्वजनिक गरेको छ । सहकारी तथा सामाजिक उद्यमसम्बन्धी युरोपियन रिसर्च इन्स्टिच्युट (यूरिक्स) को प्राविधिक सहयोगमा विश्वका ३ सय ठूला सहकारीहरुको सूची (‘टप थ्रिहन्ड्रेड’) केही दिन अघि सार्वजनिक गरेको हो ।

सन् २०२१ लाई आधार मानेर महासंघले कारोबार आधार र कुल गार्हस्थ उत्पादनमा प्रतिव्यक्ति आयको कारोबार अनुपात गरी ‘वल्ड कोअपरेटिभ मनिटर २०२३’ सार्वजनिक गरेको हो । रिपोर्ट अनुसार यी सहकारीहरुको कूल बार्षिक कारोबार २.४ ट्रिलियन अमेरिकी डलरभन्दा बढी छ । अघिल्लो वर्ष ३ सय ठूला सहकारीहरुको संयुक्त कारोबार वार्षिक करिब २.१७ ट्रिलियन अमेरिकी डलर थियो ।

कुल गार्हस्थ उत्पादनमा प्रतिव्यक्ति आयको कारोबार अनुपात आधारमा भारतका इफ्को तथा अमूल क्रमशः पहिलो र दोस्रो नम्बरमा छन् । तेस्रो नम्बरमा फ्रान्सको ग्रुप एग्रिकोल रहेको छ । यसैगरी, वार्षिक कारोबारको आधारमा सूचीको पहिलो नम्बरमा फ्रान्सको ग्रुप क्रेडिट एग्रिकोल रहेको छ । दोस्रो नम्बरमा जर्मनीको रेभे र तेस्रो नम्बरमा ग्रुप बीपीसीई रहेको छ ।

पहिलो आधारमा १०५ कृषि सहकारी, ९६ बिमा सहकारी र ५७ थोक तथा खुद्रा सहकारी रहेका छन् । यस्तै, दोस्रो आधारका १०३ कृषि, ८७ बिमा सहकारी परेका छन् । थोक तथा खुद्रा सहकारी व्यवसाय ५६ वटा रहेका छन् । ३९ वटा वित्तीय सहकारी यो आधारमा ‘टप थ्रिहन्ड्रेड’ भित्र परेका छन् भने वार्षिक कारोबारको आधारमा २७ वटा वित्तीय सहकारी मात्र परेको आईसीएको प्रतिवदेनमा उल्लेख छ ।

यसैगरी, वार्षिक कारोबारको आधारमा युरोपका १ सय ६६ देशका सहकारीहरु ३ सय ठूला भित्र परेका छन् भने दक्षिण र उत्तर अमेरिकाका गरी ९४ वटा सहकारी तथा एशिया प्रशान्तका ४० सहकारी सूचीमा अटाएका छन् ।

 

 प्रतिवेदन