३० लाख धरौटीमा छुटे कालिका साकोसका तत्कालीन अध्यक्ष मृगेन्द्र, २५ ठग अझै फरार

लमजुङ : बेंसीसहरस्थित कालिका बचत तथा ऋण सहकारी संस्थाका तत्कालीन अध्यक्ष मृगेन्द्र घिमिरे ३० लाख रुपैयाँ धरौटी बुझाएर तारेखमा रिहा भएका छन् ।

ठगी अभियोगका मुख्य दोषी भनिएका घिमिरे विरुद्ध जिल्ला अदालतमा सहकारी ऐन कसुर र ठगी सम्बन्धी दुई वटा मुद्दा चलाईएको थियो ।
जिल्ला अदालतका स्रेस्तेदार उपसचिव भेषराज पौडेलको इजलासले घिमिरेलाई मंगलबार ३० लाख रुपैयाँ धरौटीमा छाडेको हो । जिल्ला न्यायाधीश शिवप्रसाद खनाल बिदामा रहेका कारण उक्त मुद्दामा पौडेलले आदेश दिएका हुन् । न्यायाधीश खनाल आएपछि आदेशका लागि मुद्दा पुनः इजलासमा पेस हुनेछ ।

घिमिरेविरुद्ध सम्पत्ति शुद्धीकरणको समेत मुद्दा छ । उक्त मुद्दाको अनुसन्धानका लागि सम्पत्ति शुद्धीकरण विभागमा समेत पठाइएको छ ।

बेंसीसहरको शेरास्थित कालिका बचत तथा ऋण सहकारी संस्था लिमिटेडको रकम अपचलन काण्डमा फरार रहेका घिमिरेलाई प्रहरीले काठमाडौंबाट आइतबार पक्राउ गरी बेंसीशहर ल्याएको थियो ।

सहकारी काण्डका अर्का मुख्य दोषी भनिएका घिमिरेका श्रीमती विनिता अधिकारी घिमिरे अझै फरार छिन् । अधिकारी सहकारीको संस्थापक प्रबन्धक र एकीकरणपछिको कोषाध्यक्ष हुन् ।

यस संस्थाका सहकारी ऐन कसुर अन्तर्गतको मुद्दामा जिल्ला प्रहरी कार्यालय लमजुङले सहकारीसम्बद्ध सुरुमा ८ जनाविरुद्ध पक्राउ पुर्जी जारी गरेको थियो । जसमध्ये मंसिर १० गते ६ जनालाई प्रहरीले पक्राउ गरेका थिए भने घिमिरे दम्पत्ती भने फरार थिए । त्यसपछि २६ जनाविरुद्ध पक्राउ पुर्जी जारी भएकोमा १ जनालाई मंसिर १७ गते पक्राउ गरिएको थियो । पक्राउ गरिएका ७ जनालाई जनही ७ लाखदेखि १२ हजार रुपैयाँसम्म धरौटी रकम बुझाएर तारेखमा रिहा भएका छन् ।

प्रहरीमा उजुरी परेकामध्ये २५ जना अझै फरार छन् ।