नेफ्स्कून निर्वाचन: प्रतिनिधि मनोनय फारम बुझाउने समयसीमा सकियो, कति आए प्रतिनिधि?

काठमाडौं : नेपाल बचत तथा ऋण केन्द्रीय सहकारी संघ (नेफ्स्कून)को ३२औं वार्षिक साधारण सभाका लागि सदस्यहरुले आधिकारिक प्रतिनिधि मनोनय फारम दर्ता गराउने समयसीमा आज सकिएको छ ।

यही पुस ७ र ८ गते आयोजना हुने निर्वाचन सहितको साधारणसभाका लागि मनोनय फारम दर्ता गराउने समयसीमा मंसिर ३० गते (आज) सम्म मात्रै तोकेको थियो । नेफ्स्कूनले आज शनिबार पनि कार्यालय खोलेर सदस्यता नविकण र मनोनय फारम दर्ता गराएको थियो ।

नेफ्स्कूनको वार्षिक साधारण सभाबाटै निर्वाचनको एक साता अघि नै सदस्यता नविकरण र मनोनय फारम दर्ता गराईसक्नु पर्ने निर्णय गरेको थियो । सोही निर्णयको आधारमा नेफ्स्कून व्यवस्थापनले आजसम्म नविकरण र फारम संकलन कार्यलाई जारी राखेको थियो ।

नेफ्स्कूनका सूचना अधिकारी गणेश तिमिल्सिनाका अनुसार सदस्यता करिब ३४ सय सदस्यको नविकरण भएको जानकारी दिए । करिब ३ हजार मनोनय फारम दर्ता सिस्टममा अपलोड भैसकेको र केही अपलोडकै क्रममा रहेको उनले बताए ।

नेफ्स्कूनमा ४ हजार ६ सय ४६ प्रारम्भिक सहकारी, ६५ जिल्ला बचत संघ र तीन वटा प्रदेश संघ आवद्ध छ ।