सुशासन र पारदर्शितामा भक्तपुर बचत संघ अब्बल, सदस्यलाई लाभांश १५ प्रतिशत

काठमाडौं : भक्तपुर जिल्ला बचत तथा ऋण सहकारी संघको १९ औं बार्षिक साधारण सभा सम्पन्न भएको छ ।

संघका अध्यक्ष कृष्ण गोविन्द लाखाजुको सभापतित्व एवं नेपाल मजदुर किसान पार्टीका अध्यक्ष नारायणमान बिजुक्छेंको प्रमुख आतिथ्यतामा शनिबार सम्पन्न भएको हो ।

संघका सचिव जगनाथ प्रजापतिले संघको आ.व. २०७९/८० को बार्षिक प्रगति प्रतिवेदन प्रस्तुत गर्दै १५ प्रतिशत लाभांश प्रस्ताव र संरक्षित पुजी फिर्ता दिने प्रस्ताव पेश गरेका थिए । संघका कोषाध्यक्ष कान्छा भक्त घजुले आ.व. २०७९/८० को वित्तीय प्रगति प्रतिवेदन पेश गरेका थिए ।

सभाले आ.व.२०७९/८० मा २ अर्ब २२ करोड ७४ लाख ३९ हजारको वासलात र ३ करोड ४० लाख ५३ हजारको नाफा सहितको लेखापरिक्षण प्रतिवेदन पारित गरेको छ । साथै, आगामी आ.व.२०८०/८१ मा संघको वासलात २ अर्ब ४५ करोड ५ लाखको बजेट पारित गरेको छ । संघका लेखा सुपरिवेक्षण समितिका संयोजक बालमुकुण्द उपाध्यायले आ.व.२०७९/८० को लेखा सुपरिवेक्षण समितिको बार्षिक प्रतिबेदन पेश गरेका थिए ।

उक्त सभामा संरक्षित पुँजी फिर्ता कोष बचत र ऋणको आधारमा अधिकत्तम योगदान गर्ने बचतमा उपकार बचत तथा ऋण सहकारी संस्था लि., सिद्धि गणेश बचत तथा ऋण सहकारी संस्था लि. र भक्तपुर गणेश बचत तथा ऋण सहकारी संस्था लि. र ऋणमा बंगलामुखी बचत तथा ऋण सहकारी संस्था लि., संगम बचत तथा ऋण सहकारी संस्था लि. र अमरज्योति बचत तथा ऋण सहकारी संस्था लि. गरी तीन तीन वटा संस्थालाई संरक्षित पुँजी फिर्ता रकम सहित प्रशंसा पत्र वितरण समेत गरिएको थियो । सभामा संघमा आबद्ध २०२ वटा संस्थाहरुबाट १६१ जना प्रतिनिधि, ८ जना अतिथि, १६ जना पर्यवक्षक र ९ जना कर्मचारी गरीे जम्मा १९४ जनाको उपस्थिति रहेको थियो ।

सभामा बोल्दै बिजुक्छेंले सहकारी धनी वर्गलाई नभई किसान, न्यून आय भएका वर्गको उत्थानको लागि हुनुपर्ने बताए । सहकारीमा नाफा घाटाको भन्दा पनि सदस्यको जीवन परिवर्तनका लागि कार्य गर्नुपर्ने बताए ।

त्यस्तैसंघका अध्यक्ष कृष्ण गोविन्द लाखाजुले सहकारीमा लोभी बचतकर्ता, कमजोर नियमन र कमजोर सहकारी अभियानका कारण सहकारी क्षेत्रमा संकट देखिएको बताए । सहकारी क्षेत्र सुधार कार्यदलले दिएका सुझावहरु तत्काल कार्यान्वयनमा ल्याई सदस्यको बचत सुरक्षा गर्नुपर्ने उनले बताए । संघहरुले सहकारीका सिद्धान्त, ऐन नियम र आफ्नै विनियम पालनाको अवस्था अनुगमन गरेर मात्र सदस्यता प्रदान गरेमा अभियान शुद्धिकरण हुने बताए ।