अन्ततः पशुपति सहकारी समस्याग्रस्त

काठमाडौं : सरकारले पशुपति सेभिङ एण्ड क्रेडिट को-अपरेटिभ लिमिटेडलाई समस्याग्रस्त घोषणा गरेको छ । भूमि व्यवस्था, सहकारी तथा गरिबी निवारण मन्त्रालयको मन्त्री स्तरिय निर्णबाट समस्याग्रस्त घोषणा गरिएको हो ।

सहकारी विभागको नियमन क्षेत्रभित्र रहेको पशुपतिले २०७७ सालदेखि बचतकर्ताको बचत फिर्ता गर्न सकेको थिएन । सहकारी ऐनको दफा १०४ को उपदफा (१) को खण्ड (क) देखि (च) सम्मको अवस्था विद्यमान रहेकोले सहकारी विभागका रजिष्ट्रारको सिफारिसमा सोही ऐनको दफा १०४ को उपदफा (२) बमोजिम समस्याग्रस्त घोषणा गरेको हो ।

मन्त्रालयले उक्त संस्थाको सम्पत्ति व्यवस्थापन र दायित्व भुक्तानीसम्बन्धी कार्य गर्न सोही ऐनको दफा १०५ बमोजिम गठित समस्याग्रस्त सहकारी व्यवस्थापन समितिमा समेत पठाई सकेको छ ।

सहकारी विभागले २९ फागुन २०७९ मा सहकारीलाई समस्याग्रस्त घोषणा गर्न सिफारिस गरेको थियो । यस्तै विभागले सहकारीका अध्यक्ष शिवि लामासहित सञ्चालक र व्यवस्थापकलाई पक्राउ गरी अनुसन्धान गर्न सीआईबीलाई १९ जेठमा पत्राचार गरेको थियो ।

विभागले सीआईबीलाई अनुसन्धानको लागि पत्राचार गरे पनि अहिलेसम्म सीआईबीले भने कारबाही अगाडि बढाएको छैन । सहकारी सहकारी विभागमा ५३ करोडको माग दाबीसहित बचतकर्ताले उजुरी दिएका छन्।